Причина за создавање камен е презаситеност на урината со состојки кои имаат својство за кристализација. Тие се излачуваат како природен резултат на филтрирањето на крвта, што е една од улогите на бубрезите. Кога ќе дојде до презаситување на урината со непожелни супстанци доаѓа до создавање на ситни кристали кои на крајот на спојуваат и формираат камен во бубрегот или бешиката. Една од 20 личности го има овој проблем, кој најчесто се јавува во летните месеци, а причината заради која се појавува се прехранбените навики. Во лето постои поголема потреба за течност, која често се игнорира заради лимитираниот пристап на тоалетите. Заради тоа се пие помалку вода, а тоа создава најголем проблем. Важно е и каква храна се консумира. Доколку е поголем внесот на храна од животинско потекло, намирници богати со шеќери, натриум или фруктоза, значително се зголемува можноста од појава на камен во бубрегот. Хипервитаминозата со витаминот Д, исто така, може да доведе до оваа здравствена состојба. И стресот може многу да придонесе за појава на камен. Пет до 12 часа по сериозен стрес доаѓа до зголемено излачување на калиум, а 20 до 30 часа до зголемено излачување на оксалати што може да доведе до појава на камен во бубрезире или бешиката. Иако се верува дека мажите имаат почесто проблем со ова, и жените често ги мачи истиот проблем. Најчесто се јавува меѓу 30 и 50 година од животот.
Тешко е да не се забележат симптомите на камен во уринарните патишта, бубрезите или бешиката. Болката е главно мошне остра, ненадејна и спаѓа во една од најсилните познати во медицината. Болката го опфаќа долниот дел од грбот, потоа се шири кон бешиката или тестисите. Се појавува наеднаш, се засилува, а потоа станува речиси неподнослива во следните неколку часа. Може да бидат присутни и други симптоми како што се мачнина, повраќање, нагон за почесто мокрење, кое притоа може да биде мошне болно и на крајот може да доведе до појава на крв во урината. Кога ќе се појави каква било болка во пределот на грбот и предниот дел од телото не смее да се одложува одењето на лекар, затоа што доколку не се работи за проблем со бубрезите може да е последива на други, опасни болести.
Каменот може да се разбие со помош на лекови и течности, а само во најтешки случаи е потребна операција. За да не дојде до овој нималку, „наивен“ здравствен проблем важно е да се води сметка за организмот. Пред се, да се внесува што помалку сол, окалати, животински протеини. Дневниот внес на вода би требало да биде околу три литри, а во топлите денови и повеќе.
