Мигрената се манифестира со пулсирачка болка на една страна од главата проследена со мачнини и нагони за повраќање, а доколку не се лекува може да трае и до 72 часа. Кај децата и постарите лица е поретка, но може да се појави пред 10. година и да трае се до 70. година.
Се смета дека од мигрена страдаат 20% од вкупната популација.
Жените страдаат повеќе од мигрена отколку мажите. Честотата на напади на мигрена е различна – кај некои луѓе се јавува неколку пати месечно, додека кај други и неколку пати во текот на целиот живот.
ПРИЧИНИ
Нападите на мигрена често се поврзани со менструацијата или менопаузата, додека во бременоста се јавуваат многу ретко. Може да бидат предизвикани од фактори како што се: стрес, телесен напор и нагли промени на времето. Исто така на нападите на мигрена може да влијаат и консумирањето на одредени видови храна и некои намирници: сирење (поради тиранин), чоколадо (поради фенилетиламин), конзервирана храна (поради нитрит и други конзерванси), алкохол…
РАЗЛИКА МЕЃУ МИГРЕНА И ГЛАВОБОЛКА
Основна разлика е периодичната пулсирачка главоболка која се јавува во напади. Најчесто е локализирана на едната страна од главата, со пулсирање во слепоочницата или тилот, проследена со мачнини и повраќање. Меѓу нападите болниот нема никакви пречки. Другите главоболки може постојано да бидат присутни (на пр. главоболка поврзана со синуси предизвикува постојан притисок во подрачјето на челото), или болката се појавува во целата глава, како кај тензичните главоболки, кај кои болката се одразува како обрач кој стега околу челото.
ВИДОВИ НА МИГРЕНА
Според класификацијата на Меѓународното друштво за главоболка, мигрените, според симптомите, се делат на:
- Мигрена без аура или обична, со пулсирачка главоболка на едната страна од главата, која може да трае од 4 до 72 часа. Проследена е со мачнини и повраќање, како и чувствителнност на светло и бука;
- Мигрена со аура или класична, кај која на главолката и претходи т.н. аура, која може да се манифестира како пречки со видот, дамка во видното поле која се зголемува, појава на светли точки; може да се јават и други невролошки симптоми, како што се трнење и слабост во рацете, нозете и на едната страна од лицето, говорни пречки, промена на расположението, вртоглавици, општа слабост, раздразливост…
- Мигрена со компликации или продолжена аура, кај која се изразени драматични невролошки испади, како на пример: различен степен на одземеност на една страна од телото, пореметување на рамнотежата, губење свест…
- Мигренозен статус, односно форма на мигрена во која нападот на главоболка трае подолго од 72 часа, без оглед на лекувањето.
