![vreme (2)](https://panacea.mk/wp-content/uploads/2018/03/vreme-2.jpg)
Од плус 20 Целзусови степени до циклон Димитар кој се очекува од денеска да донесе снег, ниски температури, па и појава на мраз! Што е многу – многу е! Наглите временски промени може да бидат виновник за разни здравствени проблеми, особено при преминувањето од една сезона во друга.
По зимата, вчера ја пречекавме пролетта, а со неа и колебливите, варијабилни температури. Ненадејните скокови и падови на температурата влијаат лошо врз крвниот притисок, срцето и циркулацијата, што на крајот може да доведе до разни проблеми како што се несоница, главоболка и замор кои се придружени со чувство на нервоза и раздразливост.
Еве како овие симптоми предизвикани од наглите временски промени да ги поминете полесно…
Следете ја временската прогноза и подгответе го телото за разликите во температурата
Како што секое утро проверуваме каква е температурата надвор за да решиме што да облечеме, така треба да ја следиме и временската прогноза и да видиме дали се најавуваат драстични разлики помеѓу утринските и дневни температури за да може нашето тело да се прилагоди на промените.
Физичка активност
Секоја форма на физичка активност која трае половина час, па и повеќе, ќе го направи телото поиздржливо и поотпорно на влијанието на временските промени. Уште подобро е ако таа физичка активност се одвива во природа, на чист воздух. Активностите во природа, исто така, ќе помогнат да се ослободите од стресот и да ги намалите шансите за главоболка
Разновидна исхрана
Здравата исхрана богата со овошје и зеленчук е добар предуслов за намалување на влијанието на времето врз нашиот организам. Покрај тоа, важно е редовно да пиете вода и во доволни количини. Експертите препорачуваат 2 до 3 литри вода дневно.
Заменете го кафето со чај
Билните чаеви ќе влијаат на вашиот нервен систем и ќе ве релаксираат, што директно влијае на чувствата како што се замор и раздразливост, предизвикани од ненадејни промени во временските услови. Така, во овие денови, наместо прво утринско кафе, напијте се чај од камилица.