Ретко кое бебе не добива осип во пеленската регија која е секојдневно изложена на влага, топлина, урина, измет и креми со кои се третира таа област. Исто така, кај бебињата активноста на потните и лојните жлезди не е целосно развиена, а сето тоа влијае на тенката и чувствителна кожа на бебето да се појави иритација.
Што е пеленски осип? Воспаление во регионот на пелените кое ги опфаќа сите иритации на подрачјето на гениталиите и анусот, како и наборите на кожата. Иритациите може да се јават во форма на точкест осип со различен интензитет, а ако потраат преминуваат во меурчиња.
Пеленскиот осип речиси сигурно ќе се појави доколку хигиената е неадекватна и пелените ретко се менуваат, но може да се појави и како реакција на антибиотици, дијареја, алергија на храна, пелени, детергент, омекнувач… Исто така, може да се појави и за време на никнување на забите, вакцинација, воведување нова храна…
Редовно менување на пелени
За да се спречи пеленскиот осип најважно е редовно менување на пелени и соодветна хигиена, која вклучува миење на гениталиите, газето и наборите на кожата, нежно сушење со тапкање, па дури потоа нанесување на тенок слој на крема со цинк оксид и ставање на пелена.
Mногу е важно пелената да се прилагоди на возраста на детето и неговата тежина. Ако, пак, користите памучни пелени, што е реткост во ова време, најдобро е да ја одбегнете употребата на омекнувач при перење
Педијатрите често советуваат бебето да се остава во просторија со соодветна температура, разголено, без пелени за да може кожата да се исуши и да „диши“.
Ако забележите дека ништо од ова не ви помага и дека пеленскиот осип е постојано присутен кај бебето, веројатно, причината е нешто повеќе од иритација со урина, измет и несоодветна пелена или нега и, секако, треба да се обратите кај вашиот педијатар.
