Иако пушењето го зголемува ризикот од многу заболувања, меѓу кои се срцевите болести, мозочниот удар и ракот на бели дробови се повеќе луѓе неуспешно се борат со овој порок. Џенифер Анистон, Чарлиз Терон и Мет Дејмон се само некои од познатите кои успешно престанале да пушат и останале „чисти“ од никотин долги години. Еве како им успеало, па можеби ќе го следите нивниот пример.
Џенифер Анистон
Со години била страстен пушач, но успешно престанала да пуши откако наводно поминала низ екстремна детоксикација за време на која се поздравила со кофеинот и долгогодишната зависност од цигари. Бидејќи со оставањето на цигарите неизбежно доаѓаат и несаканите килограми, како клучни се покажале вежбите, особено јогата. Менди Ингбер, инструкторка по јога и добра пријателка на Анистон, ја запознала актерката со оваа техника која, како што вели самата, и го сменила животот.
Чарлиз Терон
Оскаровката признала дека била „многу зависна“ од цигари и дека долго мака мачела да ги остави. За да се соочи со стресот во еден период од животот пушела дури и по 3 кутии цигари! После неколку неуспешни обиди, цигарите ги оставила со помош на хипноза и усвојување здрави животни навики како што се јога и пилатес.
Мет Дејмон
Актерот долги години бил навлечен на цигари, се додека еден ден не договорил третман кај хипнотизер. По само три сесии почувствувал дека неговата желба за цигари исчезнува.
„Еднаш кога ќе сфатите кои се последиците, пушењето повеќе едноставно не е ваша опција. Мислам дека тоа важи за сите видови зависност,“ рекол Дејмон.
