Од пред четири дена, Фондот за здравствено осигурување воведе препишување и издавање на лекови без хартија, односно преку електронски рецепт – еРецепт за хронична терапија за хронично болни лица.
Тоа во пракса значи дека хроничните болни немаат потреба повеќе да одат кај својот матичен лекар за да им препише и да им издаде хартиен рецепт. Се што треба да направат корисниците на хронична терапија е телефонски да го исконтактираат својот матичен лекар и да добијат информација дека им е искреиран електронскиот рецепт. Потоа одат директно во аптека и со документ за лична идентификација може да ги подигнат пропишаните лекови. Истовремено, предвидена е и можност, други лице да ја подигне терапијата во нивно име, доколку хроничните пациенти не можат лично да го сторат тоа.
Според најавите од Фондот за здравство, оваа мерка која беше донесена со цел за поголема заштита на хроничните болни како најранлива категорија од можна зараза со коронавирусот, ќе продолжи да се применува и во иднина, по завршувањето на пандемијата со КОВИД-19.
Од Фондот велат дека овој систем кој засега функционира единствено за хроничните пациенти, за одредено време ќе профункционира и за сите осигуреници и за сите дијагнози.
Во земјава, Фондот за здравствено осигурување има склучено договор за издавање лекови со партиципација/доплата со 773 аптеки, како и избор на матичен лекар, гинеколог или стоматолог со 1236 приватни здравствени установи од општа медицина, 1096 приватни здравствени установи од областа на стоматологијата и 165 приватни здравствени установи од областа на гинекологијата.
Преку дигитализација на рецептите на хронично болните лица, Фондот во реално време ќе ја следи валидноста и обемот на издадени рецепти и лекови. Исто така во реално време, стручните служби на Фондот ќе може брзо и ефикасно да интервенираат при евентуални индиции за недоследности или злоупотреби на системот.
КАКО ФУНКЦИОНИРА ПРОЦЕСОТ СО еРЕЦЕПТ
Самиот процес опфаќа две фази:
- Прва фаза или процес на пропишување на еРецепт кај матичниот лекар
- Втора фаза или процес на издавање на лек во аптеката врз основ на пропишан еРецепт кој важи во сите 773 аптеки кои имаат договор со Фондот
Осигурено лице се појавува кај својот матичен лекар за да му пропише лек за акутна состојба со внес на потребните податоци во софтверот на матичниот лекар, што е исто како и досега. Пропишаниот лек се проследува до Мој термин, а потоа и до Фондот за контрола каде на софтверот на матичниот лекар се враќа информација за неговата валидност, односно дали е на товар на Фондот.
За пропишување на хроничен рецепт, осигуреното лице не мора да се појави кај матичниот лекар, туку може телефонски да побара пропишување на лековите за хронична терапија. Матичниот лекар му пропишува хроничен лек со внес на потребните податоци во софтверот на избраниот лекар.
Пропишаниот лек се проследува до Мој термин, а потоа и до Фондот каде на софтверот на матичниот лекар се враќа информација за неговата валидност, односно дали е на товар на Фондот. Матичниот лекар само за пропишување хронична терапија нема потреба од издавање на хартиен рецепт.
Процесот во аптеките останува како и досега, со тоа што:
Лицето во аптека кое бара лек се идентификува со документ за лична идентификација
Аптекарскиот стручен кадар иницира проверка по рецептот, дали е валиден, дали е претходно реализиран итн.
По издавањето на лековите аптеката веднаш го евидентира и означува рецептот за реализиран во новиот систем (нема да е дозволено одложено евидентирање)
Аптеката ќе добие одговор за успешноста на валидацијата, дали рецептот е реализиран на товар на Фондот, по што реализираниот рецепт нема да може повторно да се искористи.
