Јајцата се извор на холестерол, но истовремено содржат и многу хранливи материи. Постојат контрадикторни докази за тоа дали консумирањето јајца е штетно или здраво за срцето. На пример, студија објавена во 2018 година во списанието Heart, во која учествувале околу половина милион возрасни лица во Кина, открила дека луѓето кои консумираат едно јајце дневно имаат значително помал ризик од срцеви заболувања и инфаркт од луѓето кои јадат јајца многу поретко.
Со цел подобро да ги разберат процесите кои влијаат на здравјето, авторите на новата студија истражиле како консумирањето јајца влијае на маркерите на кардиоваскуларни болести во крвта.
Професорот од Универзитетот во Пекинг Ланг Пан и неговиот тим избрале 4.778 учесници во истражувањето, од кои 3.401 имало некоја кардиоваскуларна болест, а 1.377 луѓе немале. Тие ги мереле метаболитите во плазмата од крвта на пациентите. Повеќе од 20 видови на метаболити биле поврзани со нивото на консумирањето јајца.
Анализата покажала дека лицата, кои умерено јаделе јајца имат повисоки нивоа на протеини во крвта, како и молекули кои помагаат во чистење на холестеролот во крвните садови и штитат од запушување кое може да доведе до инфаркт.
Кај луѓето кои јаделе помалку јајца, нивоата на добри метаболити биле пониски, а на штетните повисоки, во споредба со лицата кои редовно јаделе јајца, пишува Science Daily.
“Нашите резултати покажуваат дека умерената консумација на јајца може да помогне во заштитата на здравјето на срцето“, вели Канкинг Ју, исто така професор на Универзитетот во Пекинг.
Потребни се дополнителни истражувања за детално да се открие поврзаноста, но авторите нагласуваат дека и ова може да бидат добри насоки во креирањето на националните политики.
