Според мислењето на научниците, една од причините за рак на дојка може да биде воспаление поттикнато од штетни бактерии. Имено, воспаление предизвикано од бактерии во каналите на дојката може да ја поремети хиерархијата на матичните клетки и да предизвика рак на дојка. Исто така, се смета дека бактериите кои ја ферментираат лактозата во дојката делуваат заштитно и го намалуваат ризикот од рак на дојка.
Неколку претходни студии покажале дека консумирањето јогурт е поврзано со намалување на ризикот од рак на дојка. Се смета дека за таквиот заклучок заслужна е замената на штетните бактерии со корисни бактерии.
Треба да се потсети дека во телото на човекот постојат околу 10 милијарди бактериски клетки, а иако повеќето од нив се безопасни, некои од тие бактерии создаваат токсини кои поттикнуваат воспаление во телото.
Хроничното воспаление ги уништува штетните микроби, но истовремено го оштетува и оргазнимот. Една од најчестите воспалителни состојби е болест на непцата или пародинтитис кој се поврзува со карциноми на усната шуплина, рак на хранопроводот, рак на дебелото црево, рак на панкреасот, рак на простата и рак на дојка.
Матичните клетки кои се делат за да се надоместат клетките на слузницата на каналите на дојките исто така се под влијание на микрофлората, а одредени состојки во неа, како што се покажало и кај други органи како дебело црево и желудник, може да го зголемат ризикот од развој на рак.
Се смета дека слично сценарио се одвива и во дојката, при што микрофлората влијае на делбата на матичните клетки и ризикот од рак.
