Повеќе студии укажале на тоа дека консумирањето моркови може да се поврзе со намалување на ризикот од одредени типови карцином. Со анализа на резултатите од пет различни студии научниците дошле до заклучок дека консумирањето моркови го намалува ризикот од рак на желудникот и до 26 проценти. Една друга студија, пак, покажала дека личностите кои јадат повеќе моркови имаат за 18 отсто помалку шанси за појава на рак на простата.
Морковите дури можат да го намалат и ризикот од карцином на белите дробови кај пушачите – во една студија во која учествувале 1 266 испитаници (и здрави и заболени од белодробен карцином) утврдено е дека пушачите кои воопшто не го јадат овој зеленчук имаат три пати поголем ризик од појава на карцином на белите дробови од оние кои јадат моркови најмалку еднаш неделно. Научниците сметаат дека за овој протективен ефект се заслужни каротеноидите кои ги содржи морковот, како што се алфа-каротенот, бета-каротенот, лутеинот и зеаксантинот.
