Уште еден топол ден е пред нас. Како да се преживее? Имаме неколку совети како да се разладите и да го одбегнете негативното влијание на здравјето.
Пијте вода, но не премногу
Овој совет сте го слушнале неброено пати, но мораме да ве потсетиме. На овие жештини клучно е да пиете течност и тогаш кога не чувствувате жед. Препорачаното дневно количество вода е меѓу 1,5 и 2,5 литри. Важно е, исто така, да не ги пречекорите препорачаните рамки затоа што премногу течност може да го намали нивото на сол во крвта. Одбегнувајте да пиете ладни напитоци да не настинете. Држете се настрана од алкохолот! Алкохолот предизвикува дехидратација, а тоа е нешто што најмалку ви треба за време на овој топол бран.
Останете дома
Најдобро е да ги одложите оврските и ако е можно да останете во разладена просторија. Особено е важно на сонце да не излегувате меѓу 11 и 21 часот. Ако баш морате најдобро е да носите светли материјали, најдобро памучни за кожата да дише.
Спуштете ги ролетните
Затемнете ја просторијата во која престојувате за да го намалите загревањето од надвор. За време на најтоплиот дел од денот спуштете ги ролетните или навлечете ги завесите. Дури кога надворешната темрепартура ќе падне под онаа внатре, отворете ги прозорците и вратата за да го освежите воздухот во домот.
Разладувајте се со вода
Водата не треба само да ја пиете, туку да ја користите и за надворешно разладување. Ако не сте во можност да се истуширате во млака вода, наполнете леѓен со ладна вода и ставете ги стапалата или наквасете пешкирче и со него избришете ги главата и телото. Сипете ладна вода во шишенце со распрскувач и испрскајте се по лицето, главата, рамениците.
Отстранете го дополнителното загревање
Ако сте дома, исклучете ги сите светла и електро уреди кои греат. Место компјутер подобро користете лап топ. Јадете ладни оброци и не вклучувајте рерна.
Паузирајте од спорт
Прескокнете го трчањето или одењето во теретана. Важно е физикчки да не се заморувате кога е мошне топло. Совет е да се воздржите од какви било активности на отворено.
Препознајте ги симптомите на сончаница
Ако некој се жали или кај себе чувствувате симптоми како што се грчеви во стомакот, главоболка, вртоглавица или телесна температура повисока од 38 степени, добро разладете се и појдете на лекар.
