Американската агенција за храна и лекови не одобри никакви терапии конкретно за лекување на мајмунски сипаници. Сепак, американскиот Центар за контрола и превенција на болести, ЦДЦ, го направи достапен антивирусниот лек тековиримат, за кој вели дека може да се даде на пациенти заболени од мајмунски сипаници на кои им се заканува сериозен развој на болеста.
Вакцинацијата може да ја спречи или да ја ослаби болеста
Според податоците на ЦДЦ, мајмунските сипаници преминуваа од лице на лице на различни начини, вклучувајќи директен физички контакт со осипот што го предизвикуваат сипаниците, “респираторни излачувања“ кои може да се пренесат со контакт или со интимен телесен контакт како што е полов однос, но исто така и со допорање на облека која била во контакт со телесни течности или заразен осип.
Д-р Ентони Фаучи, главен американски експерт за заразни болести, во понеделникот изјави дека се чини дека болеста “почесто ги погодува“ мажите кои имаат полови односи со други мажи.
“Кога ќе ги погледнете тие податоци, дали тоа значи дека тоа е болест на геј мажите? Секако дека тоа не е случај“, изјави “Но, во овие околности, кога ќе земеме предвид какви видови однесувања придонесуваат за ширење на болеста – иако никако не сакате да стигматизирате луѓе кои се погодени од одредена заразна болест – мора да ја информирате заедницата за опасноста, но и лекарите кои ги лекуваат пациентите, така да тие не ја превидат точната дијагноза“.
Вакцината Jynneos е единствено директно одобрена во САД за мајмунски сипаници. Уште една вакцина, наречена ACAM2000, исто така е одобрена и може да се користи.
ЦДЦ вели дека вакцинацијата може да се препорача за луѓе кои имале близок контакт со заразено лице, на оние кои биле изложени на вирусот и на оние кои се во опасност од изложување на вирусот, како што се здравствените работници или лабораториските работници.
ЦДЦ препорачува вакцинација најдоцна четири дена по изложувањето на вирусот и вели дека ако некое лице ја прими вакцината помеѓу четири и 14 дена од изложување на вирусот, таа сепак може да има некои одредени придобивки, како што е ублажување на симптомите на болеста.
ШТО АКО ВИ СЕ ДИЈАГНОСТИЦИРАНИ МАЈМУНСКИ СИПАНИЦИ
Знаците на инфекција со мајмунски сипаници обично започнуваат во рок од три недели по изложувањето на вирусот и вклучуваат симптоми слични на грип, како што се висока температура, главоболка, болки во мускулите, воспалено грло, кашлица, треска и исцрпеност, наведува ЦДЦ.
Симптомите карактеристични за мајмунски сипаници се отечени лимфни жлезди и осип. Според ЦДЦ, осипот може да изгледа како мозолчиња или плускавци, а може да се појави на различни делови од телото и лицето, вклучително и пределот на гениталиите.
Оние на кои им се дијагностицирани мајмунски сипаници треба да се изолираат дома, велат од ЦДЦ. Ако имате осип или некои други симптоми, треба да бидете “во посебна соба или дел од станот, подалеку од другите членови на семејството или домашни миленици“.
Светската здравствена организација препорачува заразените лица да се обидат да не го допираат осипот, бидејќи тоа може да придонесе за ширење на болеста.
Во повеќето случаи, заразените со мајмунски сипаници оздравуваат сами.
Терапија за сериозни случаи
ЦДЦ во САД преку Програмата за проширен пристап овозможи достапност на антивирусни лекови.
Агенцијата вели дека антивирусниот лек тековиримат може да се земе предвид за оние кои развиле тешка форма на болест на мајмунски сипаници, вклучувајќи сепса, воспаление на мозокот или други состојби за кои е потребна хоспитализација. Може да се примени и на луѓе кои се изложени на ризик да развијат сериозна болест, како што се луѓе со ослабен имун систем поради состојби како ХИВ/СИДА, оние кои страдаат од егзема, деца, бремени жени или оние со други компликации како што е бактериско кожно воспаление.
Корисноста на овој лек е потврдена во тестовите на животни кои биле заразени со вируси сродни на сипаници, вклучувајќи ги и мајмунските сипаници. Лекот бил тестиран и на 359 здрави испитаници за да се потврди неговата безбедност.
“Она што е важно е дека видовме дека пациентите досега дбро го толерираа лекот“, вели д-р Мери Фут од Одделот за здравство и хигиена во Њујорк. “Пријавени ни се неколку случаи на главоболки, еден случај на гадење, но никој не пријавил сериозни несакани ефекти.
