На глобално ниво, бројот на починати од КОВИД-19 надмина еден милион, но стручњаците се уште се трудат да го сфатат клучниот мерен податок кога е во прашање пандемијата – стапката на смртност, односно процентот на лица заразени со патогенот кои умираат од последици на болеста. Ова е преглед на прашања кои би можеле да придонесат за подобро разбирање на стапката на смртност од КОВИД-19.
Како се пресметува стапката на смртност?
За да се пресмета реалната стапка на смртност, потребно е да се спореди бројот на починати со вкупниот број на заразени, а тоа е именител кој останува непознат бидејќи е тешко да се измери целиот обем на асимптоматски случаи. Многу лица кои се заразуваат со новиот коронавирус, едноставно немаат симптоми.
Научниците тврдат дека вкупниот број на инфекции, експоненцијално е поголем од моменталниот број на потврдени случаи на зараза, а тој во моментов во светот изнесува над 33 милиони. Многу стручњаци веруваат дека коронавирусот усмртува 0,5 проценти до 1 процент од заразените лица, што го прави глобално опасен, додека не се пронајде ефикасна вакцина.
“Стапката на смртност кај лица помлади од 20 години веријатно изнесува еден на 10.000. Кај повозрасните од 85 години, смртно страда отприлика секој шестти пациент“, вели д-р Кристофер Мареј, директор на Институтот за метрика и евалуација на здравјето при Универзитетот во Сиетл.
Што е стапка на смртност?
Очигледен е падот на стапката на смртност кога се мери во однос на бројот на новозаразени, потврдени со тестирање на коронавирусот. Но, стручњаците сметаат дека воочениот пад е главно резултат на поголемиот број на тестирања во споредба со тестирањата спроведени во првите денови од пандемијата, поради што и се откриваат повеќе заразени со благи симптоми на болеста или оние кои воопшто немаат симптоми.
На поголемиот дел преживеани, без сомневање, влијание има и поквалитетниот начин на лекување на тешко заболените, како и подобрената заштита на ризичните групи.
“Денес многу повеќе знаеме за потенцијалните компликации и за начините кои ни овозможуваат да ги препознаеме и успешно да ги лекуваме. Ако со коронавирус сте се заразиле во 2020. година, подобро е тоа да биде денес, отколку во март“, вели д-р Амеш Адаља од Универзитетскиот центар за здравје Џон Хопкинс во Балтимор.
