Научниците од Универзитетот во Глазгов ја мереле силата на стисокот на раката кај повеќе од половина милион луѓе во текот на три години. Добиените резултати ги споредиле со нивната здравствена состојба, која се менувала со текот на времето, при што заклучиле дека ризикот од предвремена смрт е поголем кај луѓето чиј стисок на раката е послаб.
Инаку, со децении, овој метод се користи за мерење на здравјето и силата кај постарите луѓе, пишува „Дејли мејл“.
„Силата на стисокот е лесно мерлива и може да биде корисна во предвидување на идните болести. Јачината на стисокот покажа поголема корелација со кардиоваскуларните болести отколку крвниот притисок и физичка активност, што малку и не изненади“, објаснил Стјуарт Греј од Универзитетот во Глазгов, главниот автор на студијата објавена во магазинот „British Medical Journal“.
Повеќе од половина милион луѓе биле проучувани во проектот „UK Biobank“ од 2007 до 2010 година. Кандидатите биле на возраст меѓу 40 и 69 години. Периодично, во текот на годините, учесниците оделе на медицински прегледи, правеле различни анализи, одговарале на обемни прашања за здравјето и начинот на живот. Тимот на Греј, исто така, ги следел учесниците преку нивните медицински досиеја во просечен период од седум години.
Истражувачите заклучиле дека кај луѓето со послаб стисок постоела поголема веројатност да бидат пушачи, да имаат вишок на килограми, послаб социјален и економски статус, поголем обем на половината, како и повисок процент на телесни масти
За ова време повеќе од 13 000 лица починале, што е речиси три отсто од анкетираните. Кај околу шест проценти од учесниците се развиле срцеви заболувања, два проценти имале проблеми со дишењето, а шест проценти имале дијагноза на рак.
Нивниот стисок на раката бил мерен со специфичен уред, а оној со цврстина помала од 26 килограми кај мажите и 16 килограми кај жените, бил поврзан со поголем ризик од смрт, како и од добивање на одредени болести.
Послабиот стисок доведува до зголемен ризик од:
Смрт од срцеви заболувања – кај жените за 19 проценти, кај мажите за 22 проценти;
Смрт поради респираторни заболувања – жени 31 процент, мажи 24 проценти;
Смрт од некои видови на рак – жени 17 проценти, 10 проценти мажи.
* Послабиот стисок не бил поврзан со ризик од смрт поради рак на простата, рак на дебелото црево кај жените и рак на белите дробови кај двата пола.
Покрај тоа, истражувачите заклучиле дека кај луѓето со послаб стисок постоела поголема веројатност да бидат пушачи, да имаат вишок на килограми, послаб социјален и економски статус, поголем обем на половината, како и повисок процент на телесни масти. Биле и посклони кон нездрава храна (јаделе помалку овошје и зеленчук), помалку вежбале и повеќе гледале ТВ.
