Британските и американските научници ги здружиле силите на истражување на најраните симптоми на рак, во намерата да таа болест се открие во што порана фаза. Тие планираат да “создадат“ клетки на рак во лабораторија и да го следат нивниот развој од првиот ден.
Тоа е само едно од истражувањата на новото Меѓународно здружение за рано откривање на ракот. Од заедничката работа на раното откривање на оваа малигна болест, пациентите ќе имаат поголема корист, се вели во соопштението на здружението.
Во истражувањето се вклучени Хуманитарната организација за истражување на ракот од Велика Британија, како и универзитетите Кембриџ, Манчестер, УЦЛ-колеџ Лондон, како и Стенфорд и Орегон од САД. Нивните научници ќе разменуваат идеи и технологии од ова подрачје.
КОГА ЌЕ СЕ ОТКРИЕ, ЧЕСТО Е ДОЦНА
Научниците со заеднички сили сакаат да развијат помалку инвазивни тестови, како тестови на крв, тестови на вдишување и издишување, тестови на урина, надзор на високоризични пациенти и да ги подобрат техниките на откривање на клетките рак уште во рана фаза. Признаваат дека целиот процес е како барање игла во сено, и дека тоа би можело да потрае и до 30 години.
“Проблемот е во тоа што никогаш нема да можеме да видиме на кој начин ракот се раѓа во човечкиот организам. Кога карциномот и ќе се открие, дијагнозата е веќе поставена“, вели д-р Давид Крозби, шеф на одделот за истражување во Центарот за истражување на ракот во Велика Британија.
Во таа насока, истражувачи во Манчестер, на пример создаваат човечко ткиво на дојка со синтетички клетки како би следеле и најмали промени кои на крајот може да резултираат со развој на рак. Според проф. Роб Бристоу истражувањето е слично на формирање на банка на ткива, но секогаш постои опасност оти не значи дека сите рани промени во клетките на крајот ќе станат канцерогени. Тој и колегите сметаат дека мора да бидат попрецизни и дека мораат да водат сметка и за околината во која растеле пациентите, како би се утврдил колкав е ризикот од одредено канцерогено заболување. Дури тогаш ќе се знае на кој начин да се продолжи со понатамошни истражувања.
Според проф. Марк Ембертон од УЦЛ, употребата на магнетната резонанца во поставувањето на дијагнозата, е “тивка револуција“ и може да ја замени иглата, која се користи во биопсијата при дијагностиката на карцином на простата.
“Магнетната резонанца ги гледа само агресивните клетки. Ваквиот начин на поставување на дијагнозата е поскап и бара повеќе време, и се уште не е момент за негова широка употреба“, појаснува Ембертон.
Тој вели дека идна цел на научниците е да се утврди кои се видови рак може да се откријат со ваков начин на тестирање.
