Тимови истражувачи од универзитетите во Белфаст и Улстер откриле дека со премногу седење може да се поврзат речиси 70 000 смртни случаи во Британија. Пореметувањата кои се поврзани со праксата за долго седење се кардиоваскуларните болести, дијабетесот тип 2, одредени облици на рак (како што е ракот на бели дробови), ментални пореметувања, промени во функционирањето на мускулите и зголеме холестерол. Сепак, во студијата која е направена кон крајот на минатата година, а е објавена во магазинот „American Journal of Public Health”, се наведува дека, иако седењето често било изедначено со пушењето, а некои извори дури и сугерираат дека пушењето е посигурно од седењето – седењето и пушењето не се за споредување.
Како старееме – се повеќе седиме
Според податоците на британската Национална служба за здравство, голем број возрасни личности во Велика Британија поминуваат повеќе од седум часа дневно седејќи или лежејќи, што обично се зголемува со годините на десет или повеќе часа. Научниците утврдиле дека во Велика Британија девет отсто од случаите на рак на дебелото црево, осум отсто од рак на матката, 7,5 отсто рак на белите дробови, 17 отсто од случаите на дијабетес тип 2 и околу 5 отсто од случаите на кардиоваскуларни болести, може да бидат спречени ако се смени праксата за претерано седење и лежење.
„Дури и ако сте активни физички, седењето за време на подолг временски период му штети на вашето здравје“, вели доктор Мајк Бренан од Британската служба за јавно здравје.
Кога станува збор за споредбата на претераното седење со пушењето, во студијата објавена во магазинот “American Journal of Public Health”, истражувачите тврдат дека здравствените ризици поврзани со пушењето се далеку поголеми од оние кои се однесуваат на седењето. Додаваат дека претходната студија која анализирала 1,2 милиони луѓе во 54 држави, покажала дека претераното седење е одговорно за 3,8 отсто смртни случаи, додека 21 отсто од смртните случаи меѓу мажите и 17 отсто меѓу жените – се припишани на пушењето.
Лекарите, секако, препорачуваат во градскиот превоз да се стои, да се користат скали место лифт и место во гледање телевизија или пред компјутер слободното време да се искористи за некоја активност.
