Бојата на кожата, кршливи нокти, проблеми со устата – сето навидум неважно, но сето укажува на поголеми проблеми. Секако, не треба да се крева голема паника околу скршен нокт, но сепак е добро да знаете како да ги препознаете знаците кои предупредуваат за нешто посериозни кога е здравјето во прашање.
Кршливи нокти и коса
Доколку ноктите и косата се слаби и лесно се кршат, можно е дека ви недостасува витамин Б. Исто така, ова може да укажува и на анемија или проблеми со штитната жлезда. Секако, ако често користите лак за нокти или пегла за коса, проблемот може да биде и во тоа.
Непца кои крварат
Доколку при миење на забите плукате крв, тоа би можело да значи дека ви недостасува витамин Ц. Исто така, ова може да биде и знак за гингивитис, односно воспаление на непцата, кое може да се претвори во сериозен проблем. Непцата знаат да крвават и поради лошо одржување на оралната хигиена, или ако користите претврда четка за заби.
Грчеви во нозете
Ако често чувствувате грчеви во нозете, тоа би можело да значи дека на телото му недастасува калиум или магнезиум. Причина за тоа може да биде претерана физичка активност, а грчеви може да предизвикаат и одредени лекови.
Чешање на кожата
Ова може да значи дека имате сува кожа, но може и да укаже на алергија од некоја храна. Важно е да следите кога точно почнува да ве чеша и да воочите дали постои некоја причина поврзана со тоа.
Лош здив
Во ред, може само сте јаделе лук, но ако не, нешто е сомнително. Лошиот здив може да е поради воспаление на непцата, кариес, но може да биде и знак дека немате доволно плунка во устата, па потребно е да пиете вода почесто.
Поспаност
Постојано сте изморени, па колку и да спиете постојано сте ненаспани. Ова, исто така, може да биде знак на анемија или пореметување на штитната жлезда. Причина може да биде и лошата исхрана, дијабетес или стрес. Доколку покрај постојаниот замор се чувствувате и незадоволно, тажно, причина би можела да биде и депресијата.
