Самодовербата е одраз на вистинската слика за тоа колку се цениме самите и колку сметаме дека сме важни. Како резултат на многу непријатни ситуации што ги носи животот, самодовербата може сериозно да биде нарушена. Како тоа влијае на нас и како не обликува како луѓе, зависи од човек до човек.
Секоја жена барем еднаш во животот се соочила со ниско мислење самата за себе. Добро е што постојат повеќе успешни начини да се поврати самодовербата што сериозно го подобруваат животот и на личноста и на нејзините најблиски.
Престанете да се опседнувате со огледалото
Со постојано гледање на одразот во огледалото, се размислува за несовршеноста на телото, што може да доведе до оптовареност со надворешниот изглед, а тоа многу често предизвикува недостаток на самодоверба.
Радувајте се на комплиментите
Многу жени не веруваат во комплименти и треба да научат како да ги прифатат убавите зборови што другите им ги упатуваат. Тоа не се секогаш празни зборови кажани со скриени намери, туку израз на тоа што луѓето навистина го мислат. Нема потреба да се негираат фактите искажани како комплимент.
Верувајте во себе и своите квалитети
Секоја жена има специфични квалитети кои ја прават единствена, кои другите луѓе ги сакаат и поради кои се чувствуваат убаво во нејзино друштво. Размислете и откријте кои се вашите силни страни и уживајте во нив. Верувајте во себе и во тоа што сте.
Бидете отворени
Бидете отворени за нови луѓе, нови работи, за авантури и дозволете работите да се случуваат. На тој начин ќе запознавате позитивни луѓе кои ќе ви помогнат да изградите самодоверба и ќе ве поттикнат да размислувате за вашите силни страни.
Надвор од конфорната зона
Конфорната зона е безбедно место или рутина кои ни нудат сигурност. Штом ја напуштиме почнуваме да создаваме страв од неуспех. Најчесто, времето докажува дека тоа е неоправдан страв, затоа почесто мислете на тоа дека, како и секогаш, сѐ ќе биде во ред.
