Каква исхрана и треба на секоја жена?

Жените, за разлика од мажите, се во поголема мера склони кон нарушувања во исхраната и затоа често страдаат од недостаток на витамини и минерали, кои се неопходни за виталност на организмот

Во продолжение ви нудиме краток список на намирници и витамини кои треба задолжително да бидат дел од секојдневната исхрана на секоја жена

 

Калциум

Калциумот ги гради забите и коските, ги ублажува предменструалните симптоми, го одржува крвниот притисок во рамнотежа и штити од рак на дебелото црево. Потребен е за контракција на мускулите и нормално функционирање на централниот нервен систем. Речиси целата количина на калциум во организмот е сместена во забите и коските.

Млечните производи изобилуваат со калциум

За време на менопаузата нивото на естроген во телото се намалува, така што жените се во опасност од губење на коскената маса. Затоа уште од мали нозе е потребно да се јаде доволно калциум, витамин Д и да се вежба за да се намали загубата на коскената маса подоцна во животот. Млечните производи изобилуваат со калциум, а добар извор се и кељот, бадемите, сувите смокви, овошни сокови и житни снегулки. Исхраната богата со овошје, зеленчук и редовното вежбање се неопходни за здрави коски на жените од сите возрасти.

Витамин Д

Витаминот Д му помага на телото да ја одржи потребната количина на калциум и фосфор и ги прави коските поцврсти. Го зајакнува имунолошкиот систем и придонесува за раст и развој на клетките. Примарен извор на витамин Д е вашето тело – кога е изложено на сонце, организмот го произведува овој витамин. Но постарите луѓе кои во младоста не биле доволно изложени на сончева светлина, имаат дефицит на витамин Д, како и луѓето кои поминуваат малку време на воздух и во активности на отворено. Што се однесува до исхраната, со витамин Д изобилуваат јајцата и лососот. На жените, исто така, им се препорачуваат и додатоци на овој витамин.

Железо

Железото обезбедува успешен трансфер на кислород во телото. Ако немате доволно железо во крвта, најверојатно ќе се чувствувате уморни. Но и премногу железо е, исто така, опасно. Нивото на железо во крвта се намалува за време на менструацијата и кога не јадете доволно храна богата со железо, кога пиете аспирин или не добивате доволно витамин А.

Цвеклото е извор на железо

Најдобар извор на железо се месото и рибата, а луѓето кои не јадат месо имаат алтернатива во ќељот, оревите, брусницата и цвеклото. За да се зголеми апсорпцијата, комбинирајте ја храната со овошни сокови или со богата храна со витамин Ц. Дополнително железо не се препорачува без совет од лекар, затоа што невнимателната употреба може да предизвика оштетување на црниот дроб и другите органи.

Фолна киселина

Фолната киселина е витамин растворлив во вода. Помага во формирањето на црвените крвни клетки, ги спречува вродените недостатоци и го намалува нивото на хомоцистеин. Иако многу намирници денеска содржат фолна киселина, поради некои медицински состојби (бременост, лактација, алкохолизам, болест на бубрезите, заболување на црниот дроб, анемија), нивото на овој витамин може да биде намалено. Што се однесува до храната, правилото е: колку потемно толку повеќе фолна киселина. Во оваа смисла, потребно е да се јаде спанаќ, грав, портокали и житарки.

Витамин Ц

Витаминот Ц ги зајакнува крвните садови и непцата, и ги стимулира клетките да се борат против инфекциите. За жените најчесто е проблем да јадат доволно овошје и зеленчук (кои го содржат овој витамин), па полесно им е да земат чипс. Кога мислите на витамин Ц, мислите на свежо и сурово – јадете многу цитруси, темен зеленчук, салати и брокула.

Магнезиум

Магнезиумот им помага на вашите клетки во производството на енергија, ги одржува мускулите, нервите и имунолошкиот систем здрави, т.е. ги гради коските. Исто така, е важен и за регулирање на крвниот притисок и шеќерот. Јадете цела, свежа и храна богата со нутриенти за да го максимизирате нивото на магнезиум во вашето тело – се препорачуваат спанаќ, ореви, бадеми и житарки со цели зрна.