Камењата во жолчното кесе или холелитијаза е заболување кое во светот зафаќа до 20 % од возрасната популација. Според медицинската статистика, жените почесто страдаат од оваа болест и тоа особено во репродуктивниот период. Ризикот за појава на оваа состојба расте паралелено со годините. Може да поминат и 25 години пред каменот да почне да создава тегоби.
Камењата се создаваат кога одредена супстанца од жолчката ја надминува нормалната концентрација и станува нерастворлива во жолчниот сок, па како резултат на тоа се формираат кристали на кои се таложи слуз, бактерии и други состојки од жолчката. Оваа болест не дава никакви симптоми се додека не се појави силна болка поради движењето на каменчињата кои го затнуваат каналот од кој истекува жолчката во жолчниот вод и не се создаде воспаление на жолчното кесе.
Болката вообичаено се јавува под десниот ребрен лак и може да се рашири кон грбот или десното рамо. Во 90 % од случаите е проследена со гадење или повраќање.
Болките можат да се јавуваат секојдневно во вид на напади, во времетраење и до 30 минути испровоцирани од обилен оброк или алкохол. Можно е да се појават и еднаш неделно, еднаш месечно дури и еднаш годишно. Болката може да е и тапа, подолготрајна и да наликува на болка во желудникот или бубрезите.
Доколку болката трае подолго од 20 мин. и посебно ако е проследена со зголемена телесна температура, повраќање или евентуално пожолтување, лицето треба веднаш да побара лекарска помош.
Најчести ризик фактори за појава на камења во жолчното ќесе се: гојазност, бременост, отежнето истекување на жолчката од жолчното кесе, лекови, генетски предиспозиции, хемолитички синдроми, цироза на црн дроб, воспалителни болести или отстранување на дел од тенкото црево.
Карактеристични компликации кои може да се јават се: акутен холециститис (акутно воспаление на жолчното кесе), хроничен холецистит (хронично воспаление), акутен панкреатит – воспаление на панкреасот, холедохолитијаза (камења во жолчниот канал), како и карцином на жолчното кесе – состојба која настанува од долготрајно хронично воспаление.
Правилната исхрана е најдобриот начин за спречување на создавањето камен во жолчката.
