- Бебињата родени во Пакистан имаат најмали шанси да преживеат
- Македонија има втора највисока стапка на смртност кај новороденчињата во Европа, веднаш по Молдавија
- Пакистан, Централноафриканската република и Авганистан имаат просечна смртност од речиси 45 новороденчиња на секои 1 000 новородени
- Секоја година во првиот месец од животот умираат околу 2,6 милиони бебиња, а од нив, еден милион, на денот на своето раѓање
- Најголеми шанси да преживеат имаа новороденчињата во Јапонија, Исланд, Сингапур и Финска
Македонија има втора највисока стапка на смртност кај новороденчињата во Европа, веднаш по Молдавија – поразителни податоци на стартот на светската кампања на УНИЦЕФ – „За секое дете, живот“, чиј почетокот беше означен вчера во Њујорк.
Целта на глобалната кампања е единствена: смртноста на новороденчињата да стане минато. Испратен е апел до владите, здравствените институции, донаторите, приватниот сектор, семејствата и фирмите, кои се повикуваат да го одржат секое дете во живот, насекаде.
„Можеби најголемата одговорност на секое општество е одговорноста кон своите деца. Сега во светот има многу едноставен начин да се измери она што секоја земја го прави за своите најмлади граѓани. Тоа е стапката на смртност кај новороденчињата – број на деца од илјада новородени кои ќе починат во првите 28 дена од животот“, истакна во своето обраќање до јавноста по повод кампањата „За секое дете, живот“, Бенџамин Перкс, претставник на УНИЦЕФ во земјава.
Земјите со најниска стапка на смртност кај новороденчињата, после Јапонија, главно се добростоечки со јак образовен и здравствен систем: Исланд (1 новороденче во 1 000 со шанси за смрт), Сингапур (1 во 909), Финска (1 во 833) , Естонија и Словенија (1 во 769), Кипар (1 во 714) и Белорусија, Луксембург, Норвешка и Јужна Кореја (сите со ризик 1 во 667)
Стапката на смртност кај новороденчињата лесно може да се измери и да се спореди со другите земји. Таа е одраз не само на ефикасноста на здравствениот систем, туку и на развиеноста, сиромаштијата и социјалната благосостојба, стапките на заболувања и квалитетот на животната средина во земјите. Македонија има втора највисока стапка на смртност кај новороденчињата во Европа.
„И додека таа е во опаѓање во другите земји од Западен Балкан – овде од скоро е зголемена. Тоа не мора да биде така. На овие бебиња можеме да им дадеме повеќе од еден ден, повеќе од еден месец – повеќе од опстанок. Можеме да ги спасиме повеќето од нив преку финансиски прифатливи, квалитетни решенија на здравствена заштита за секоја мајка и секое новороденче“, додава Перкс.
Обезбедување соодветна пренатална грижа, прегледи и посети за сите бремени жени низ целата земја – особено за руралните жени, пристап и брз трансфер во одделенијата за неонатална интензивна нега во случај на компликации се дел од препораките на претставникот на УНИЦЕФ. Тој се осврна и на другите критични фактори кои водат до компликации во текот на бременоста. „Во земјава, скоро секоја четврта жена пуши за време на бременоста. Ова го зголемува ризикот од повеќе негативни здравствени исходи поврзани со бременоста, вклучувајќи и ниска родилна тежина, неонатална смртност, мртвороденче и предвремено породување. Идните мајки треба да бидат подобро информирани за знаците и сим
томите на опасност и за ризиците при трудовите и породувањето. А најдобар начин ова да се направи е преку јакнење на мајките и семејствата да бараат и да добијат квалитетна здравствена заштита“, вели Перкс, кој ја поздрави определбата на Министерството за здравство да изработи Акционен план за секое новороденче, со цел да се решат овие недостатоци.
Во новиот извештај за смртност кај новороденчињата УНИЦЕФ информира дека стапката на смртност кај новороденчињата во светот и натаму е алармантно висока, особено во најсиромашните земји во светот. Бебињата родени во Јапонија, Исланд и Сингапур имаат најдобри шанси за преживување, а новороденчињата во Пакистан, Централноафриканската Република и Авганистан – најлоши.
