Научниците од еден американски универзитет спровеле истражување за кармините и сјаевите за усни при што дошле до загрижувачки резултати. Колку што еден потег со кармин може да нѐ разубави во даден момент, толку може да ни наштети на здравјето на подолг рок, особено ако претераме со неговата употреба.
Имено, научниците тестирале 32 различни производи за усни и во нив откриле високи концентрации на олово, хром, алуминиум и уште пет тешки метали. Во некои производи концентрациите биле толку високи што предизвикале оправдана загриженост за здравјето, односно зголемен ризик од развој на карцином и невролошки потешкотии.
Докажано е дека просечниот корисник на кармин дневно може да внесе и до 20 проценти повеќе алуминиум и манган отколку што е дозволено, истакнуваат научниците
Се разбира, ова не значи дека мора веднаш да престанете да ги користите кармините и да ги фрлите сите во ѓубре. Сè уште можете слободно да ги мачкате усните во вашата омилена нијанса, само обидете се да бидете умерени во употребата. Брендови во истражувањето не се именувани, но научниците истакнуваат дека не постојат големи разлики помеѓу сите кои се присутни на пазарот и дека резултатите може да се сметаат за релевантни за сите компании.
