Болестите на штитната жлезда изискуваат од самиот болен, но и од неговото семејство, работна околина и од пошироката општествена заедница активен ангажман во унапредување на квалитетот на животот на заболеното лице. Причина се значајните пореметувања на здравствена состојба кои го намалуваат квалитетот на живот и влијаат на секојдневието и активностите на поединецот.
Според Светската здравствена организација, во светот има две милијарди заболени од некакво пореметување на штитната жлезда, а од нив 20% се жители на Европа. Жените почесто заболуваат, а секоја трета жена има јазол на штитната жлезда, додека секоја десетта има некои од пореметувањата на нејзината функција.
Карциномот на оваа жлезда е за четири пати почест кај жените, отколку кај мажите, а најчесто се открива во средната животна доб. Болестите на штитната жлезда често се удружени со други болести на жлездите со внатрешно лачење и со автоимуните болести, болестите на срцето, проблеми во бременоста, депресија, хроничен стрес и анксиозност.
РИЗИК ФАКТОРИ
Замор, зголемување на телесната тежина, болки во мускулите, насобирање и задржување на течности, интолеранција кон студено и топло, мигрена, афти – ова се само некои од симптомите кои упатуваат на потешкотии во работата на оваа жлезда.
Причини за појава на пореметувања на работата на тироидеата може да бидат автоимуни процеси во организмот, лоша исхрана, недоволен внес на јод, одредени лекови, стрес, генетика, бременост, менопауза, пушење. За време на раниот рзвој на детето, недостатокот на хормонот на штитната жлезда доведува до пореметување на развојот на мозокот, предизвикува намален раст и когнитивен потенцијал кај децата. Зачестеноста на конгениталната хипотиреоза е околу 1 на 4.000 новородени деца. Најчести болести на тироидеата се гушавост (струма), тиреодитиси (воспалителни болести на жлездата), хипотиреоза, хипертиреоза, Хашимото тиреодитис (автоимуна болест), токсичен аденом (бенигнен тумор).
ЕДУКАЦИЈА
Научете сами како можете да ја прегледате штитната жлезда, дознајте како стресот и исхраната се поврзани со оваа жлезда што се нарекува енергетска централа на организмот, побарајте совет лекар или појдете на преглед. Бидејќи ако штитната жлезда не функционира правилно, не функционирате ниту вие!
