Кашлицата е вообичаена појава со која се соочил секој човек. Доколку не се појават дополнителни симптоми или тегоби, кашлицата поминува сама за неколку дена без лекарска интервенција или медикаменти. Лекарите велат дека кашлицата е заштитник на здравјето бидејќи ги спречува несаканите супстанции да минуваат низ грлото во телото. Може да биде акутна или хронична.
Сепак, кашлицата во некои случаи, особено доколку не поминува подолг период може да биде и симптом на некои болести, дури и на многу сериозни нарушувања на здравјето.
Хроничната кашлица трае повеќе од осум недели, се јавува секојдневно и може да биде со или без искашлување. Бројни студии во светот покажаа дека со хронична сува кашлица се соочува до 40 отсто од вкупното население, а 10 отсто имаат хронична кашлица со искашлување. Хроничната сува кашлица со искашлување е полесна за лекување, бидејќи е јасна причината за болеста. Пациентите најчесто се пушачи, а кашлањето го поттикнува и загадувањето на воздухот или други болести.
Најчеста причина за хронична кашлица без искашлување, пак, е некоја хронична пулмонална болест или употреба на некои лекови. Хронична сува кашлица може да биде последица и од хронично воспаление на носот и синусите, гастритис или астма. Најчесто, причина е една од овие три состојби, а често и сите заедно.
Акутната кашлица се јавува при вирусна инфекција. Прва е фазата на сува кашлица бидејќи вирусот го оштетува епителот на дишните патишта, каде што се наоѓаат рецепторите за кашлица. Оваа кашлицата е дефанзивна и не треба да се спречува бидејќи овозможува акумулираниот вирус и секретот што се создава да бидат исфрлени од телото.
По фазата на сува, иритирачка кашлица, следува фазата на продуктивна кашлица, која треба да се стимулира. Најдобар начин е да се зема доволно течност и хербални сирупи кои го омекнуваат секретот за да може полесно да се исфрли. Акутните респираторни инфекции поминуваат за пет до седум дена, во некои случаи до десет дена.
