Еден од најчестите сигнали кои ни ги испраќа телото е кашлицата. Тоа е всушност рефлекс со кој се чистат дишните патишта од материите кои ги надразнуваат. Се разликуваат според карактерот – сува и продуктивна и според траењето – акутна и хронична кашлица. Причините за кашлица се бројни – може да биде сосема безопасен одговор на организмот на иритација, но и алармантен сигнал дека вашето тело се бори со тешка болест.
Токму затоа што причини има многу, луѓето најчесто кашлицата сметаат дека е појава која брзо ќе мине и на која не треба да и се посветува премногу внимание, што во некои случаи може да биде фатална грешка.
Најчести причини за сува кашлица се сув и зачаден воздух, алергии, инфекции на дишните патишта, асма… Вирусите и грипот најчесто предизвикуваат продуктивна кашлица, но и тогаш може прво да се јави сува кашлица која после ден-два „созрева“. Важно е да посветите внимание и на траењето на кашлицата. Акутна кашлица трае до три недели, додека се што е подолго се смета за хронична кашлица, за која е неопходно да се најде причината. Покрај должината и видот на кашлица посветете внимание и на тоа дали има други симптоми.
Ако со кашлицата се јави и засипнатост, температура, секрет, веројатно, се работи за вирус, па би било добро да појдете на лекар. Важен е и изгледот на секретот – ако е со жолта или зелена боја, веројатно, се работи за бактериска инфекција, воспаление на синусите или дури бронхитис. Од друга страна, секрет со розова боја, а сето проследено со главоболка и температура, може да биде знак на воспаление на белите дробови, а ако во секретот има и траги на крв може да се работи за канцер или туберкулоза. Доколку кашлицата трае подолго од три недели, а притоа е придружена со свирење и болка во градите, крв во искашланиот секрет, вртоглавици, ВЕДНАШ појдете кај вашиот лекар, затоа што ова може да се симптоми на тешка белодробна болест.
Постојат неколку начини да се спречи кашлицата:
- Редовно проветрување на просториите;
- На радијаторите ставете садови со вода за да го спречите исушувањето на воздухот;
- Редовното чистење на домот може да ја спречи кашлицата предизвикана од алергиска реакција…;
- Користете природни средства за одржување на домаќинството – кашлицата може да е резултат на испарувањето на хемикалиите;
- Обидете се што е можно повеќе да го зајакнете имунитетот – спијте доволно, внесувајте витамини, избегнувајте цигари и алкохол;
- Не чекајте кашлицата да се влоши – навреме почнете со користење на соодветен препарат за искашлување.
