Етеричните масла можат да помогнат во ублажувањето на стресот, напнатоста и главоболката. А кога е болката во главата во прашање, различни масла можат да ни помогнат кај различни видови главоболка.
Кај главоболка која е резултат на притисок може да помогне масло од нане – во 10 мл (2 супени лажици) базно масло (на пример, од бадем, јојоба, маслинки или кокос) измешајте 3 капки масло од нане и со таа мешавина измасирајте ги вратот и рамената.
При главоболка предизвикана од стрес може да ви помогне и инхалирање на мирис на лаванда и цитруси – на шамиче капнете 1-2 капки етерично масло по избор и полека вдишувајте ја пријатната арома. Исто така, можете 1-2 капки масло да измешате со базно масло, да го протриете меѓу дланките и потоа со дланките да ги прекриете носот и устата и полека да го вдишувате релаксирачкиот мирис на етеричното масло.
Со вдишување на мирис на нане и лаванда (директно од шишенцето со масло) во траење од 15 минути може да се ублажи болката кај мигрена. Би било добро ако секогаш имате шишенце од едно од овие две масла со себе и штом почувствувате дека болките почнуваат инхалирајте од маслото од лаванда или нане.
