Истражување објавено во стручното списание Nature Medicine на 18 јуни, укажува на ризиците на користењето “пасоши на имунитет“ за КОВИД-19 и го поддржува продолжувањето на јавноздравствените мерки како социјално дистанцирање и изолација на високоризичните групи, велат научниците.
Здравствените власти на некои земји, како Германија, расправаат за етичноста и механизмите на одобрување на лицата кои имаат антитела, послободно да се движат од оние кои ги немаат.
Истражувањето кое опфатило 37 пациенти кои имале симптоми на КОВИД-19 и 37 асимптоматични пациенти, утврдило дека кај оние кои развиле IgG антитела, еден од главните типови антитела по инфекцијата, во повеќе од 90 проценти од случаевите, дошло до нивно нагло опаѓање во период од два до три месеци.
Притоа е воочено дека концентрацијата на IgG антителата и во акутна фаза на болеста и во фаза на рано опоравување кај асимптоматските болни била значајно помала, отколку кај оние кои имале симптоми.
Антителата бележеле пад под прагот на откривање кај 40% од асимптоматските и кај 13% од симптоматските болни.
Студијата ја спровеле истражувачи од Медицинскиот факултет Чонгкинг, кој е огранок на Центарот за надзор и превенција на болести во Кина.
Јин Донг-Јан, професор по вирологија на Унивезритетот во Хонг Конг, кој не бил дел од истражувањето, вели дека студијата не ја негира можноста заштита да можат да пружат други делови на имуниот систем.
Некои клетки помнат како да се справат со вирусот откако по прв пат ќе се инфицираат, и можат да создадат ефикасна заштита ако дојде до нов круг на зараза. Научниците се уште истражуваат дали тој механизам функционира и кај новиот коронавирус.
Дури и ниски нивоа на моќните одранбени Т и Б клетки можат да обезбедат заштита, истакнуваат стручњаците, па заклучокот на оваа студија не значи дека тие лица ќе се заразат по втор пат.
“Заклучокот од ова истражување не значи дека небото се сруши“, вели проф Јин забележувајќи дека бројот на вклучени пациенти во студијата е премал.
Истражувања во случај на САРС и МЕРС покажале дека антителата на тие коронавируси траат и до една година.
Ова е прво истражување кое покажало дека антителата на новиот коронавирус кој предизвикува КОВИД-19 се развиваат и кај асимптоматските пациенти.
