Во Лондон се отвора клиника за лекување зависност од играње на комјутерски игрици што е резултат на неодамнешното категоризирање „зависност од игри“ во ментална болест од страна на Светската здравствена организација.
Овој вид на зависност подеднакво може да го загрози здравјето на поединецот, како што го нарушува и зависноста од разни други пороци, бидејќи симптомите се слични, се наведува во оценката на британските здравствени власти. Затоа е одлучено на овој начин да им се помогне на лицата со овој проблем.
Така, во англиската престолнина наскоро ќе биде отворен Центар за зависници од видеоигри. Подоцна Центарот ќе биде проширен на лекување на зависници од други содржини на интернет, како што е порнографијата.
Целиот проект ќе биде финансиран од страна на Националната здравствена служба, како и други медицински организации.
Оваа „болест“ најчесто ги погодува тинејџерите и младата популација, па неретко се случува младите да го запостават училиштето, што се одразува на различни аспекти, но и самиот квалитет на нивниот живот, сметаат од СЗО.
Основачот на клиниката, психијатарката Хенриета Боуден Џоунс смета дека засега не постои опасност од епидемија на оваа болест, но дека центарот, секако, ќе им помогне на оние кои имаат проблем. Таа е задоволна бидејќи смета конечно овој тип на зависност ќе се третира на соодветен начин.
Од друга страна, одредени психјатри го критикуваат овој потег бидејќи сметаат дека болеста мора да се лекува системски во поширока смисла. Тие тврдат дека всушност зависноста од игрици е само дел од севкупниот проблем, како и дека мора да се подигне свеста за одговорно однесување на општо ниво.
