Студеното време е вистински предизвик за нашиот организам. Беснеат вируси и бактерии, а сите сакаме да го поминеме тој период без покачена температура. Со внимателен избор на одредени намирници, можеме да му помогнеме на имуниот систем да се бори против ваквите предизвици.
Имуниот систем е неверојатен систем на специфични органи и клетки кои му овозможуваат на телото да се брани од несакани патогени. Правилното функционирање на овој систем е од суштинско значење за одржување на хомеостазата.
Одредени намирници се познати како добра помош при зајакнување на имунитетот, кој е клучен за одбрана, дури и од вирусни заболувања чија сезона е започната.
- Пробиотици
Според дефиницијата на Светската здравствена организација, пробиотиците се живи микроорганизми кои, применети во соодветна количина, имаат позитивни ефекти врз здравјето.
Дигестивниот систем се смета за најголем имунолошки орган, а пробиотиците служат за воспоставување урамнотежена цревна микробиота. Здравата микробиота спречува патогени да влезат во организмот, но и помага во функционирањето на одбранбените клетки на организмот.
Во зима главен извор на пробиотици е киселата зелка, а се препорачува да се консумира кефир, јогурт и други ферментирани млечни производи.
- Пребиотици
Пребиотиците се несварливи прехранбени состојки кои поволно влијаат на организмот бидејќи селективно стимулираат раст на одреден број бактерии и на тој начин го унапредуваат здравјето. Овесот и јачменот се извори на бетаглукан. Кромидот, бананите, артичоката и аспарагусот содржат инулин.
- Сина риба
Сината морска риба е одличен извор на омега-3 масни киселини, кои имаат антиинфламаторно дејство. Хроничното воспаление во телото го ослабува организмот и тој е чувствителен на напади од штетни микроорганизми. Се препорачува да се консумира ситна сина риба најмалку два пати неделно.
Јадете инчуни, сардини, скуша. Покрај омега-3, таквата риба е богата и со витамин Д, кој е моќен имуномодулатор. Витаминот Д се синтетизира во телото со редовно изложување на сончева светлина.
- Лук
Тој е извор на органосулфурни соединенија (како алицин) кои имаат имуномодулаторни својства и ги ублажуваат симптомите на грип и настинка. Затоа, се препорачува редовно консумирање лук.
Најдобро е секако свеж, но може да се конзумира и во намази, како сок или чај и во капсули. Позитивно влијае и на нивото на холестерол во крвта.
- Антиоксиданти
Цитрусното овошје (мандарина, лимон, портокал и грејпфрут) и зелениот чај се моќни извори на антиоксиданти (витамин Ц и разни катехински соединенија). Антиоксидантите го неутрализираат дејството на штетните слободни радикали кои се јавуваат во организмот како резултат на физички и психолошки стрес.
- Пилешка супа
Пилешка супа како помош при настинка не е мит. Топлата супа го загрева горниот дел од респираторниот систем и ја разредува слузта што се насобрала таму и на тој начин го олеснува дишењето.
Исто така, супата обично содржи целер, кромид и моркови, како и зачини магдонос и тимјан, кои имаат антиоксидантно и антиинфламаторно дејство. Протеините од пилешкото пак се потребни за синтеза на антитела.
- Мед
Медот е популарен поради неговите антибактериски својства. Консумирањето мед поттикнува излекување и има антибактериско дејство така што ги намалува нивоата на простагландините и има пребиотско дејство.
- Куркума
Куркуминот е активна состојка на куркумата. Има антивирусни, антибактериски и антиинфламаторни својства. За ублажување на симптомите на грип и настинка, половина лажичка куркума може да се измеша со млеко и вода. Некои додаваат и бибер и ѓумбир за засилено делување.
