Некои масла за јадење спречуваат кардиоваскуларни болести, некои ја регенерираат кожата, но има и такви кај кои нивото на маснотии е многу високо, па доколу често ги користиме може да го загрозиме нашето здравје. Доколку не сакате да направите погрешен избор, проверете што има во маслата. Во наредните три продолженија ќе ви објасниме кои се нивните лековити својства, кое масло како да го користите и за што е најдобро.
Масло од кикиритки
Маслото од кикиритки е состојка која е незаменлива во американската кујна. Поради високата концентрација на заситени масни киселини, маслото од кикиритки е во полуцврста агрегатна состојба на собна температура (паста) и е попознато како путер од кикиритки. Тоа е исклучително калорично, но има многу позитивни дејства врз здравјето на човекот. Се користи за пржење, печење, но и за салати. Многу е ароматично, па не треба да претерувате кога го користите. Изобилува со фолна киселина, која овозможува брза регенерација, додека линолната киселина, витаминот Е и калиумот го намалуваат ризикот од срцеви заболувања. Во оригиналната амбалажа може да се чува една година, а кога ќе се отвори, рокот на траење се намалува на максимум шест месеци.
Сусамово масло
Станува збор за растително масло добиено од сусамово семе. Погодно е за подготовка на разни јадења, но поради јакиот вкус најчесто се меша со сончогледово масло. Ова масло е одличен извор на незаситени масни киселини, витамини А, Б и Е, калциум, фосфор и антиоксиданти кои ги чуваат коските и забите, но и ја регулираат работата на црниот дроб. Сусамовото масло е богато со железо и содржи висок процент на сите есенцијални аминокиселини, особено метионин. Метионинот се внесува исклучиво преку храна. Маслото од сусам е едно од постабилните природни нерафинирани масла, но сепак е ограничено и треба да се внимава од поголема изложеност на светлина и високи температури за време на екстракцијата, преработката и складирањето со цел да се минимизира загубата на хранливи материи по пат на оксидација. Сусамовото масло најпрво се користело како еден вид на гориво за домаќинство. Денес, постојат голем број фабрики за производство на вакво масло и неговата примена станува се повеќе и повеќе ефикасна. Претставува многу добар извор на Б-комплекс витаминот, како што се ниацинот, фолната киселина, тиаминот (витамин Б1), пиридоксинот (витамин Б6), и рибофлавинот. Ниацинот помага во намалување на нивото на ЛДЛ-холестеролот во крвта. Претставува голем извор на протеини во исхраната со висок квалитет на аминокиселини, кои се од суштинско значење за растот, особено кај децата.
Бадемово масло
Најдобрите својства на ова масло ќе ги добиете ако го користите како прелив за салати или како арома за колачи. Изобилува со билни белковини, витамини А, Е, Б1, Б2 и Б6, но содржи и незаситени масни киселини кои се неопходни во исхраната. Бадемовото масло го подобрува варењето, ја намалува надуеноста на стомакот, го намалува воспалението на дебелото црево, а се користи и против воспаленија и изгореници на кожата. Иако со своите нутритивни својства заслужува да се најде на трпезата, кај нас најчесто се користи во козметиката, за нега на кожата и на косата. Но во Турција или Иран речиси секоја салата што ќе ја изедете ќе биде зачинета токму со бадемово масло.
Маслиново масло
Ова масло е се поприсутно во нашата исхрана. Најчесто со маслиново масло печеме риба и го ставаме во теста, но се користи и за зачинување на салатите. Многу е здраво бидејќи содржи незаситени масни киселини кои го регулираат нивото на холестерол во крвта, и на тој начин го штитат срцето и крвните садови. Обрнете внимание на рокот на траење и купувајте исклучиво масло кое е цедено во календарската година. Ако не го користите често, купувајте помали количини. Маслиното масло е чувствително на светлина и затоа треба да го чувате исклучиво на темно место. Лесно поприма вкусови, па може да го збогатите со лук, лута пиперка, кора од лимон, жалфија, оригано… Така ароматизирано, маслото може да се служи со парчиња препечен леб, како предјадење.
