Покрај исхраната и начинот на живот, постојат и други фактори кои можат да имаат значајно влијание врз плодноста. Доколку планирате да го проширите семејството, земете ги предвид следниве неколку фактори кои можат да имаат ефект врз плодноста, а на кои може да влијаете.
Пушење
Жените кои пушат може да имаат потешкотии со зачнувањето. Една студија покажала дека забремениле 48 % од жените кои биле непушачи, 19 % од жените – пушачи и 20 % од пасивните пушачи. Ако наскоро планирате да започнете да работите на тема бебе, обидете се да прекинете со пушењето, стојте настрана од пушачите и воопшто, од чадот на цигарите.
Жените – пушачи кои се одлучуваат за ИВФ (ин витро оплодување) имаат потреба од повеќе обиди за да останат бремени. Интересно, жените пушачи, исто така, порано влегуваат во менопауза за разлика од оние жени кои не пушат. Пушењето го намалува и производството и квалитетот на спермата.
Алкохол
Алкохолот ја намалува плодноста со менување на нивото на хормони, кое потоа ги намалува шансите за овулација. Ова придонесува потешко да забремените. Консумирањето алкохол за време на бременоста може да го загрози развојот на бебето, уште една негативна последица од алкохолот.
Стресот и анксиозноста може да ја намалат плодноста со промена на имунолошкиот систем и функцијата на хормоните
Кафе
Иако не постојат дефинитивни резултати кои го поврзуваат кофеинот со неплодноста, кофеинот може да го промени нивото на хормоните. Ова може да влијае на овулацијата и репродукцијата. Се уште не е јасно колку кофеин е лош за плодноста.
Едно данско истражување покажало намалена плодност кај жените кои пушеле и пиеле повеќе од осум шолји кафе на ден. Уште едно европско истражување покажало дека пиењето повеќе од пет шолји кафе дневно го зголемува ризикот од неплодност.
Стрес
Стресот и анксиозноста може да ја намалат плодноста со промена на имунолошкиот систем и функцијата на хормоните. Стресот го зголемува нивото на кортизол и адреналин, што негативно влијае на целото тело.
Загаден воздух
Изложеноста на многу фактори од средината и загадувачи, вклучувајќи го и зрачењето и одредени хемикалии, може да има негативно влијание врз плодноста. На пример, мажите изложени на пестициди имаат ризик од намалување на квалитетот на спермата.
