Кога детето има зголемена телесна температура често се случува паника во домот, особено ако таа се јавува прв пат. Како да ја намалиме температурата? Дали методите на нашите родители, баби и дедовци се вистинскиот начин? Треба ли на детето да му се даде сируп или чепче? Ова се само дел од прашањата кои ги мачат родителите, а особено оние новопечените.
Откако ќе ја измерат температурата, голем дел од родителите решаваат да применат некои од методите кои ги научиле од своите родители, кои, пак, не мора нужно да бидат правилни. Така на пример, во минатото често на децата им се ставале облоги натопени во алкохол, најчесто ракија, што всушност, не се препорачува. За разлика од алкохолот, облоги од млака вода, кои ќе се менуваат на секои четири до пет минути, се еден од методите кои даваат резултати.
Се препорачува и капење или туширање со млака вода на температура до 30 степени, или ако е детето премногу нервозно или му студи, овој метод на разладување треба да се одложи или да се побара некој друг начин.
Но пред да купите каков било лек на своја рака, консултирајте се со педијатар. Тој ќе ви ја препорача и правилната доза, во согласност со телесната тежина, возраста и интензитетот на болеста на детето.
Ако ректалната температура е над 38,5 степени, на детето ставете му чепче или дајте му сируп
Многу е важно е на вашето дете постојано да му нудите доволна количина на течности, најдобро е вода или чај, а препорачливо е и да го облечете во лесна памучна облека. Треба да внимавате собната температура во која детето престојува да не надминува повеќе од 20 степени.
Доколку температурата, и покрај сè, остане подолго од еден, најмногу два дена, неопходен е преглед на педијатар.
