Ако се откажале од животот, луѓето може да умрат, а таквата ситуација може да се случи за само неколку дена, покажало најновото истражување.
Д-р Џон Лич од Универзитетот Портсмут вели дека неговото истражување покажало дека откажувањето или психогената смрт е здравствена состојба која навистина постои. Во неговата студија се забележува дека луѓето може да умрат во рок од неколку дена по трагедијата што ги погодила. Тоа ќе се случи кога лицето не верува дека може да ја преброди агонијата што му се случува.
Лекарот ја нарекол оваа состојба „give-up-itis“, име кое настанало за време на Корејската војна, кога затворениците меѓусебно престанале да зборуваат, не сакале да јадат и едноставно изгубиле волја за што било
Како што пишува „Дејли мејл“, лекарот верува дека кога едно лице се чувствува поразено, доаѓа до промена во мозокот и повеќе не постои мотивација за грижа за самиот себе. За магазинот „Medical Hypotheses“ го коментирал своето истражување и рекол дека психогената смрт е реална, но дека не станува збор за самоубиство и не е поврзано со депресијата, а се случува многу често откако лицето ќе преживее некоја страшна траума.
Д-р Лич открива и пет фази од оваа состојба и како се менува со текот на времето. Се почнува со социјалното повлекување, а потоа лицето губи интерес за другите, но и за себе. Третата фаза е неможноста да се донесуваат одлуки, додека во четвртата фаза веќе нема контрола врз себе. Петтото ниво е психогена смрт, а се опишува како состојба во која лицето целосно ја изгубило волјата за живот.
- Решението на оваа ситуација лежи во физичка активност, како и освестувањето на лицето дека ситуацијата е под негова контрола – и двете решенија се позитивни бидејќи со хемиска реакција се ослободува допамин, а токму тој игра важна улога во нашето ментално здравје.
Лекарот вели дека едно лице се смета делумно излечено кога самото ќе увиди дека има контрола над ситуацијата и ќе го врати интересот за животот.
