Променливото време и доаѓањето на постудените денови го зголемува бројот на заболени со настинки, воспаленија и инфекции предизвикани од вируси и бактерии, кои неретко се проследени со температура – здрава и природна реакција на организмот која е вродена и е најсилна заштита од вируси и од бактерии.
Таа се намалува со лекови, објаснуваат група германски истражувачи, дури кога ќе биде над 38,5 степени Целзиусови.
Степенот на треската не укажува нужно на сериозноста на ситуацијата. Помала болест може да предизвика висока температура, а понекогаш сериозна болест не мора да ја зголеми телесната температура. Последицата од благо зголемената температура или грозницата е состојба кога температурата се зголемува над вообичаениот распон. Таа се разликува од поединец до поединец. На температура над 39 степени, микробите не може да се размножуваат.
При високата температура се забрзуваат метаболичките процеси за пет до осум пати, се зголемува производството на интерферон кој спречува развој на вирусот, количината на железо во плазмата се намалува, а тоа е важно за спречување на раст на бактериите. Истовремено се зголемува подвижноста и делувањето на белите крвни зрнца кои ги уништуваат микробите.
При благо зголемена температура, онаа која не е поголема од 37,8 степени лекарите не препорачуваат нејзино спуштање со лекови, бидејќи на тој начин болеста која е причинител на грозницата би можела да продолжи.
Инаку, вирусите кои предизвикуваат настинка и други респираторни инфекции напредуваат на нормална телесна температура, а со предизвикување на состојба на благо зголемена температура организмот можеби сака да го елиминира вирусот.
Лекарска помош е потребна ако температурата стигне до 40 степени и не се спушта без лекови ни после три дена, а е проследена со чувство на силна исцрпеност.
