Со оглед на тоа дека една од главните причини за овој тип главоболка е стресот, редовното бавење со спорт ќе ви помогне директно да го „напаѓате“ причинителот, а не само да ги ублажите непријатните симптоми. 30 до 40 минути умерена физичка активност 3 до 4 пати неделно, исто така, ќе поттикне лачење на ендорфин, кој природно ја намалува болката. Особено се препорачува одење, возење велосипед по рамен терен (или статичен велосипед), како и пливање.
Посветете внимание на тоа како седите крај компјутерот – оддалеченоста на очите од екранот би требало да биде 50 до 60 см, додека врвот на екранот би требало да биде на ниво на очите. На секои 15 минути правете мали пауза во траење од по 20-30 секунди за време на кои ќе се фокусирате на некој предмет во далечина, а најмалку на секои два часа станете и малку прошетајте.
Одредени видови главоболки можат да укажуваат на здравствен проблем, па така алармантно е ако болката се појавува молскавично и го постигнува максималниот (неподнослив) интензитет за само неколку секунди. Ова всушност може да биде знак дека нешто се случува со крвните садови во мозокот и дека треба да посетите лекар. Ако болката се јавува наутро, тоа може да биде резултат на лошо спиење, ‘рчење, губење воздух во текот на ноќта, а во најлош случај и резултат на тумор. Затоа бидете внимателни и за секоја главоболка која не е типична, побарајте лекарска помош. Она на што треба да се обрне внимание е и во кој дел од главата се јавува болката. Доколку чувствувате како главата да ви е стегната со обрач тогаш станува збор за тензична главоболка, и таа најчесто е резултат на стрес и умор.
Масажата, која и самите можете да ја практикувате, ќе ги ублажи болките. Со врвовите од прстите, со мали кружни движења масирајте ги слепоочниците, пределот околу зглобот на вилицата, кожата на главата (особено над и зад ушната школка). Масажата на рамената и благото истегнување на мускулите на вратот и рамената, исто така, ефикасно можат да ја ублажат главоболката.
Благо греење на вратот во пределот на тилот, исто така, ќе придонесе за опуштање на мускулите и на тој начин ќе се спречи појавата на болките, односно да се ублажи веќе постоечката тензична главоболка.
На што укажува болката според тоа во кој дел од главата се јавува?
На едната половина од главата – најчесто станува збор за мигрена која не е многу опасна, но е многу напорна бидејќи често е проследена со мачнини и преголема чувствителност на звуци, светлина и мириси.
На едната страна од лицето – Овој тип е наречен кластер и може да трае со недели, па и месеци. Се манифестира со заматен вид на едното око, затната една носница, отекување на едниот очен капак, појава на осип и црвенило, а во полошите случаи и делумна парализа на фацијалната мускулатура.
Болка во челото – Најчесто е резултат на воспаление на синусите. Аналгетиците не се од голема помош, но затоа инхалацијата е прилично делотворна.
На тилот и темето – Може да биде последица на проблеми со ‘рбетот, држењето на телото, незгодно спиење или предолго седење. Од помош може да бидат вежбите за истегнување.
Во слепоочниците – Најчесто е последица на кочење на виличниот зглоб.
