Абнормалниот ПАП-тест е загрижувачки за секоја жена. Но, не секој ваков резултат е причина за грижа, со оглед дека ПАП-тестот всушност претставува скрининг метод, а не и дијагноза. За поегзактен преглед и утврдување на фактичката состојба т.е. дали станува збор само за вагинална инфекција на грлото на матката или воспаление или, пак, се работи за можен цервикален карцином, потребно е да се направи токму колпоскопија.
Колпоскопијата претставува преглед на грлото на матката и дел од вагината. Тоа е всушност помошен метод кој има за цел, заедно со претходно направен ПАП тест, да го одреди местото на абнормален епител на грлото на матката и доколку е потребно прецизно да може да се земе дел од ткивото – биопсија, за понатамошна патохистолошка анализа. Основното значење на овој метод е рано да се откријат претканцерозните промени или рано да се дијагностицира карцином на грлото на матката кој може да биде излекуван.
Колпоскопијата се практикува во случаи ако ПАП тестот го дава еден од следните резултати:
- индицира дисплазија или карцином;
- покажува присуство на ХПВ (human papiloma virus);
- покажува присуство на атипични сквамозни клетки со недетминирано значење (АSCUS) или истиот наод се повторува.
Препораките на гинеколозите се ПАП тестот и колпоскопијата да се прават непосредно по завршување на месечниот менструален циклус. Дента пред изведување на оваа процедура пациентките не треба да користат вагиналети, тампони, да се избегнува сексуален однос, да не се користат средства за интимно миење и да се испразни мочниот меур.
Колпоскопијата е лесна и безболна процедура, која се прави амбулантски и трае 10-15 мин. Докторот го користи колпоскопот да го прегледа првенствено цервиксот. Колпоскопот е голем, електричен микроскоп кој се позиционира на околу 30 см од вагината. Чистата светлина која се наоѓа на крајот од колпоскопот, му овозможува на гинекологот јасно да го види цервиксот и да ги детектира евентуално присутните промени.
