Секундарна аменореа значи отсуство на менструација подолго од 6 месеци кај жените кои претходно имале менструација. Причините се различни, па начините за надминување на состојбата се различни.
Гледајќи строго медицински и бременоста е состојба на секундарна аменореа, но она што треба да ги загрижи жените се другите причини за отсуството на менструацијата.
Најчести причини за секундарна аменореа се:
- дебелина или прекумерен BMI (Body mass indeks),
- BMI под нормалата или недостаток на масно ткиво, како што е случај кај анорексијата или булимијата
- интензивна физичка активност, до границите на издржливоста, најчесто кај професионалните спортисти,
- интензивен емоционален стрес; најчесто оваа причина е индивидуална, но стресот поврзан со сериозна болест (лично или на член на семејството), смрт во семејството, губење на работно место, несигурна финансиска состојба и слично се често причини за секундарна аменореа
Сите горенаведени причини се надминуваат под лекарска контрола и со соодветен третман. Сепак, постојат и многу посериозни причини за секундарна аменореа, кои може да упатуваат на сериозни болести. Отсуството на менструација може да биде предизвикано и од:
- тумори на мозокот или на хипофизата,
- некои лекови (цитостатици, антипсихотици…),
- синдром на полицистични јајници и други болести на јајниците.
И за овие причини за секундарната аменореа, исто така, постои соодветен третман, со медикаменти или хируршки, а најчесто во комбинација од двете.
