Според наодите на научниците, пренесувањето на коронавирусот се случува главно во затворени простории. “Бидејќи циркулацијата на воздухот на отворено е многу поголема. Имате струење на ветерот, па така многу брзо концентрацијата на аеросолите се разредува“, вели Нико Мутерс, шеф на Институтот за јавно здравје при Универзитетската клиника во Бон.
Слично вели и вирусологот Александер Кекуле, но додава – тоа сето важи ако и на отворено се држи растојание од најмалку метар и половина. “Ако не го држите тоа растојание, гледате лице в лице и гласно зборувате, пеете, викате, плукате – тогаш, наместо со аеросоли, може да се заразите по капков пат.
Студиите потврдуваат дека ризикот од инфекција надвор е исклучително мал. Едно истражување од Кина проучувало 7.324 случаи на инфекција – само еден случај на отворено. Кекуле вели дека истото важи и за мутациите на вирусот – тие се нешто позаразни, но мерките остануваат исти. „Мутантите не летаат подалеку“, вели вирусологот.
КАКО ВЛИЈАЕ ВЕТЕРОТ?
“Колку поветровито, толку побрзо ќе бидат разбиени облаците од аеросоли кои човекот ги произведува“, вели Герхард Шоих, физичар и истражувач на аеросоли. На прашањето дали на полјана каде престојуваат различни групи на луѓе е можно ветерот да ги однесе аеросолите од една до друга група, Шоих вели дека тоа практично е невозможно.
“Само поради температурата на телото, се создава еден вид воздушна струја, која претежно оди нагоре, како кај каминот“, вели физичарот. Бидејќи, телесната температура од околу 37 степени е генерално повисока од надворешната. „На тој начин потоплиот воздух се искачува нагоре, па и тој аеросолен облак“.
Една студија во Иран исто така потврди дека ветерот не игра никаква улога во пренесувањето на вирусот.
ШТО КОГА НАДВОР Е ТОПЛО, А ШТО КОГА Е СТУДЕНО?
Тоа не е до крај научно објаснето. Американските истражувачи го следеле развокот на инфекцијата во топли, студени, суви и влажни предели на Кина, и не нашле никаква разлика. Една австриска студија утврдила дека ултравиолетовото зрачење на сонцето го убива вирусот на површината, но дека тоа малку влијае на преносот на заразата од човек на човек.
Мутерс вели дека на Сонцето не треба да се потпира, повеќе ултравиолетово зрачење има во лето, но во снежните предели тоа е уште поголемо поради рефлексијата од снегот. Освен тоа, тој укажува на тоа дека пандемијата исто ги погаѓа и топлите и студените предели.
- Има ли опасност од спортот?
Стручњаците велат дека и спортистите, при џогинг, треба да држат растојание од метар и половина и покрај тоа што, во состојба на физичко оптоварување, подлабоко дишат и исфрлаат повеќе честички во воздухот. “Ако некој само протрча покрај вас, дури и на мало растојание, ризикот е многу мал“, вели Биргит Венер од Институтот Лајбниц.
- Дали средбата со пушачи е поопасен?
Ниту една студија сè уште не го поврзала пасивното пушење со зголемен ризик од инфекција со коронавирус. „Со пушењето не се исфрлаат повеќе вируси во околината“, вели Шојх. Ниту, Нико Мутерс од Универзитетската клиника во Бон не гледа на пушачите како позаразни на кој било начин.
Според институтот Роберт Кох, пушачите имаат малку поголем ризик од тешко заболување ако се заразат. Но, за другите тие не се поопасни.
- Дали има смисла маска на отворено?
Има, ако не можете да држите растојание. Особено во поголема гужва, да речеме на концерти. „Или кога сте на автобуска станица, или во ред, тогаш маската има смисла“, заклучува Венер.
