Гихтот е форма на артритис, односно воспаление на зглобовите. Се јавува како последица на изразено висока концентрација на мочна киселина во крвта, чии кристали се таложат во пределот помеѓу коските и зглобот. Најчесто заболуваат мажи во средни години, додека кај жените се јавува многу ретко.
При напад на гихт обично изненадно се јавува силна болка во еден или повеќе зглобови, обично ноќе. Болката се зголемува, зглобот отекува, а кожата над зглобот станува преосетлива, црвена или виолетова, напната, сјајна и топла. Допирањето на кожата над зглобот може да биде многу болно. За време на акутен напад на гихт, може да се појави и температура, треска, слабост и забрзан пулс.
Кристалите на мочната киселина може да се појават како грутки под кожата околу зглобовите и на рабовите на ушите. Ако почнат да се формираат во бубрезите, може да доведат до бубрежни камења.
Мочната киселина е нормален нуспроизвод од разградувањето на пурините (одредени видови протеини) и други супстанции во телото, а се отстранува од организмот преку бубрезите и урината. Но, кога се произведува прекумерна количина на мочна киселина во телото или кога нејзината елиминација преку бубрезите е отежната, може да се појави состојба на зголемена мочна киселина во телото или хиперурикемија.
Има многу работи кои можат да поттикнат напад на гихт, од лекови до дехидрација.
ШТО НАЈЧЕСТО ПРЕДИЗВИКУВА НАДАПИ НА ГИХТ?
Нападите на гихт може да бидат поттикнати од пиење на голема количина алкохол или јадење голема количина храна богата со протеини, помали повреди, хируршки процедури, стрес или ослабена состојба на организмот поради некоја болест.
ОДРЕДЕНИ МЕСО И НАМИРНИЦИ
Намирниците кои што содржат многу пурини може да го зголеми нивото на мочна киселина во крвта, што може да доведе до зголемен ризик од напад на гихт. Намирниците кои содржат висок процент на пурини се:
- Црвено месо
- Изнутрици
- Некои видови морски плодови
- Сардини
- Инчуни
- Туна
- Школки
Грашокот, гравот, леќата, спанаќот и печурките се богати со пурин, но се чини дека тие не предизвикуваат проблеми.
АЛКОХОЛ
Виното, пивото и слични напивки можат да влијаат на зголемување на мочната киселина во крвта, колку повеќе пиете, толку се поголеми шансите за напад на болка. Алкохолот е компонента која се предлага целосно да се исфрли, бидејќи освен што поттикнува лачење на вода од организмот што предизвикува концентрација на мочна киселина во преостанатата телесна течност, алкохолот го намалува и излачувањето на мочна киселина во урината.
ХРАНА БОГАТА СО ФРУКТОЗА
Фруктозата е вид на шеќер кој е поврзан со зголемено ниво на мочна киселина во крвта, што значи дека ќе поттикне акутен напад на гихт. Потребно е да се избегнува за да не се соочи со силна болка.
ВИСОК ИНДЕКС НА ТЕЛЕСНА МАСА
И обезноста е поврзана и со нападите на болка од гихт, а токму поради повисоките нивоа на мочна киселина кај таквите лица. Слабеењето заедно со правилна исхрана и вежбање може да го ублажи проблемот.
