Кога станува збор за нутритиентите кои ги содржи тиквата, најпрво треба да се спомене бета-каротенот, кој во организмот се претвора во витамин А – 100 г варена тиква задоволуваат 100 отсто од дневните потреби на телото за овој важен витамин. Истражувањата покажале дека исхраната богата со бета-каротен може да се поврзе со намален ризик од рак на простата, со заштита од асма и срцеви заболувања, како и со забавување на процесот на стареење.
Освен големото количество на бета-каротен, тиквата содржи и други каротеноиди како што се лутеинот и зеаксантинот (1014 мг во 100 г варена тиква). Адекватниот внес на овие активни состојки се поврзува со намален ризик од појава на катаракта и макуларна дегенерација. Одделни стручњаци сметаат дека лутеинот и зеаксантинот помагаат во превенцијата од рак на дојка, бели дробови, како и кардиоваскуларни заболувања.
Од минералите тиквата содржи калиум (230 мг во 100 г варена тиква) и железо (0,6 мг/100 г тиква). Калиумот е важен за регулација на крвниот притисок и превенција од мозочен удар, додека адекватниот внес на железо е од клучно значење за превенција од слабокрвност. Железото инаку е составен дел од хемоглобинот, кој преку крвотокот се пренесува до сите ќелии во телото.
