Молнупиравир, експериментален орален лек против КОВИД-19, би можел да биде најава за не така далечна иднина во која една таблета ќе спечи смрт или тешки заболувања кај лица заразени со коронавирус. Овој лек би можело да биде широко достапен и наменет за домашна употреба, а привремените резултати од клиничките тестирања веќе покажале дека во рана фаза на болеста се преполовува ризикот од хоспитализација или смрт кај пациенти склони кон тешка зараза.
За разлика од одредени произведувачи на вакцини против КОВИД-19, компанијата Мерк ќе им дозволи на генеричките производители во Индија да во стотина сиромашни земји ги продаваат таблетите по многу намалени цени, во таа група земји се и повеќето нации во Африка, каде нивото на вакцинираност на населението достигнува само три проценти.
Мерк од Американската агенција за храна и лекови (ФДА) побара итно одобрување за молнупиравирот. Како што пишува Њујорк Тајмс, заговорниците за широка достапност на овој лек велат договорите на компанијата за лиценцирање е “охрабрувачки почеток“, но се уште е мал чекор кон еднаквост. Се уште не се знае ниту кои количини од генеричкиот лек ќе бидат достапни во наредните години, а со договорите не се опфатени многу тешко погодените и недоволно вакцинирани држави.
Според Министерство за здравство, земјава планира да го набави лекот против ‘молнупиравир’. Оттаму велат дека е исконтактирано со производителот на лекот и дека за кратко време ќе започнат преговорите за набавка.
Производителот на овој лек очекува до крајот на 2021 година да произведе десет милиони пакување на лекот и дека повеќе дози ќе бидат достапни идната година.
Молнупиравир е орален лек, во форма на таблета и може да го примаат сите лица позитивни на КОВИД-19. Лекот се дава во првите пет дена од дијагностицирање на вирусот, а досегашните клинички испитувања покажуваат дека хоспитализацијата со овој лек е намалена за 50 отсто.
