Многу луѓе размислуваат за диета по Нова Година, но во мноштвото на достапни информации понекогаш е тешко да се снајдете и да одлучите кој режим е најефикасен. Затоа експертите составија листа на диети за кои научно е докажано дека се најдобри.
Медитеранска исхрана
Со години е број 1, а во неа се колнат и ѕвезди како Пенелопе Круз и Камерон Дијаз. Лекарите ја фалат поради процентот на овошје, зеленчук и цели зрна. Многу докази укажуваат дека медитеранската исхрана го зајакнува здравјето на срцето бидејќи го елиминира внесот на заситени масти и дозволува само мал внес на путер, масно месо и печива.
Исто така е богата со мононезаситени масти од маслиново масло и јаткасти плодови и омега-3 масни киселини од морските плодови кои поддржуваат здраво срце. Истражувањата ја поврзуваат оваа исхрана со низок ризик од дијабетес тип 2 и мозочен удар.
Диета за долговечност
Научниците утврдиле дека исхраната богата со интегрални житарки, мешунки и растителни протеини е еден од начините да додадеме години во нашите животи.
Диетата за долговечност вклучува 12-часовен пост и целосно исфрлање на црвеното месо. Некои риби се дозволени, додека внесот на пилешко мора да биде многу мал. Треба да се намали внесот на шеќер и рафинирани житарки.
Повремен пост
Последниве години популарноста на повремениот пост е во пораст и тоа со причина. И двете форми 5:2 и 16:8 се засноваат на интермитентно (повремено) постење, односно, тие вклучуваат јадење само во одредена временска рамка во денот, односно седмицата.
Форматот 5:2 значи консумирање храна пет дена во неделата, додека два дена потребно е да се ограничи на 500 до 800 калории дневно. Моделот 16:8 се однесува на 16 часа пост во текот на денот и 8 часа кога е дозволено да се јаде, обично помеѓу 10 и 18 часот.
Некои истражувања сугерираат дека повременото постење помага при губење на тежината, а со тоа го намалува ризикот од развој на срцеви заболувања и дијабетес. Се поврзува и со подолг живот и се вели дека го намалува ризикот од некои видови на рак и невродегенеративни нарушувања.
Психобиотска диета
Дури и оние кои не сакаат да ослабат можат да ја променат исхраната заради здравствени придобивки. Психобиотската диета или исхрана, која вклучува внес на многу влакна и ферментирана храна, може да го намали стресот и да го подобри сонот, според новите истражувања.
Пристапот вклучува јадење од шест до осум порции овошје и зеленчук дневно со висок процент на пребиотски влакна, како што се кромид, праз, зелка, јаболка и банани.
Оние кои ја следат оваа исхрана консумираат и пет до осум порции житарки дневно и три до четири порции зеленчук неделно, како и две до три ферментирани намирници дневно – како кисела зелка, кефир и комбуха.
