Работата е едноставна – состојбата на кожата (како најголем орган во човековото тело) зависи од тоа што внесуваме во организмот. Исхраната против акните и мозолчињата подразбира исклучување на одредени видови храна за секојдневна употреба, но, исто така, и зголемен внес на одредени витамини и минерали кои помагаат во намалување на маснотијата на кожата, и на тој начин спречуваат појава на проблематични акни.
ЗАБРАНЕТА ХРАНА
Шеќер – на листата на „озлогласените“ прехранбени производи, кои се сметаат за главна причина за појава на акни и мозолчиња, убедливо прво место зазема шеќерот. Тоа значи дека од исхраната треба да се исклучат чоколадото, сладоледот, тортите, слатките, газираните пијалоци и слично. Консумирањето големи количини шеќер отвара врата за разни воспалителни процеси во организмот, а со самото тоа и појава на акни. Наместо слатките богати со рафиниран шеќер, свртете се кон црното чоколадо богато со какао. Црното чоколадо е здраво (во умерени количини), а содржи и антиоксиданти. Тие ја ослободуваат кожата од слободни радикали, кои ја загрозуваат убавината на тенот на кожата.
Зачинета храна – претераното зачинување на храната, исто така, може да ја влоши состојбата на акните. Се препорачува умерено користење зачини како што се бибер, растително масло, кечап, мајонез… Од друга страна, постојат зачини чијашто употреба се препорачува, а тоа се мајчина душичка, рузмарин и нане.
Брза храна – за штетноста на брзата храна (хамбургери и пица), чипсот и помфритот (рафинирани јаглехидрати) оддамна е се кажано. Доколку консумирате прехранбени производи со висока содржина масти, немојте да бидете изненадени ако наредното утро се разбудите со лице полно мозолчиња. Премногу масти во крвотокот го забавуваат транспортот на кислород и други хранливи материи во организмот, вклучувајќи ја и кожата, која поради недостиг на кислород и витамини не може да се обновува и да остане здрава. Затоа пред да посегнете по својот омилен брз оброк размислете на тој начин што и правите на вашата кожа.
Месни преработки – шунка, салами, колбаси, односно неизбежните состојки на сендвичите, може да ја влошат состојбата на кожата и треба да се избегнуваат. Како замена може да послужи туната, зеленчукот и слично. А кога сме кај сендвичите, да додадеме дека и белиот леб и производите од бело брашно подеднакво лошо влијаат на кожата.
Млеко и млечни производи – иако постојат контрадикторни мислења, Американската академија за дерматологија во 2007 година објавила студија во која, врз основа на тримесечно следење на проблематичната кожа кај 43 тинејџери, дошла до заклучок дека постои врска меѓу исхраната богата со млеко и млечни производи и појавата на мозолчиња. Со цел да проверите дали исхраната богата со млечни производи влијае на појава на акни, во период од шест месеци пратете како вашето лице ќе реагира на поединечен внес на млеко, сирење и други млечни производи. Ова е совет, што генерално може да се примени за сите прехранбени производи. Доколку имате постојан проблем со кожата, направете мал експеримент така што првата недела од исхраната ќе го исфрлите млекото, втората масната храна, третата слатките … Така најлесно ќе забележите што ви претставува најголем проблем, а доколку не можете трајно да ја исклучите од исхраната – пожелно е оваа храна да ја јадете во помали количини.
Алкохолни пијалаци – алкохолот, исто така, може да иницира проблеми со кожата на лицето. Најчесто станува збор за црвенило, кое е придружено со проширени ситни крвни садови на образите и носот. Кога се консумира алкохол, капиларите се шират, па постои впечаток дека кожата е извалкана. Консумирањето алкохол подеднакво може да ја намали и способноста на организмот ефикасно да ги користи витамините и калциумот, со што го лишува телото од искористување на хранливите материи. Ова особено се однесува лицата кои пијат алкохол прекумерено и секојдневно.
Гледано од друг агол, исхраната треба да биде богата со витамини и минерали, кои го чуваат телото – како однадвор, така и одвнатре. Затоа, добредојдена е храната богата со цинк, витамини Ц, Б6, А и Д и есенцијални масни киселини.
Цинкот се смета како клучен фактор во одржување на здравјето на кожата бидејќи има важна улога во регенерација на клетките, а делува и антибактериски. Овој минерал го нормализира нивото на андроген и естроген во организмот и помага во заздравување на кожното ткиво. Може да се најде во јајцата, семките од тиква, оревите, пченичните никулци итн.
