Самопрегледите во никој случај не се замена за лекарски преглед, но секако треба да се прават редовно, за да се воочат потенцијалните промени и да се побара евентуална лекарска помош. Воочените промени и појави, може да не значат ништо, но може да бидат и закана за здравјето, па затоа е важно навреме да се побара стручна помош.
ГРАДИ – ЕДНАШ МЕСЕЧНО
Жените треба да бидат запознаени со своите гради, така да може да забележат било каква промена и да се јават кај лекар кој понатму ќе направи анализи, како мамограф или ехо. Забележувајте дали има било какви промени како вдлабнување, црвенило, оток, исип, болка…
КОЖА – ЕДНАШ МЕСЕЧНО
Ракот на кожа е се почест, но и неговите симптоми можеби и најлесно се воочливи. Тоа значи дека редовните самопрегледи на кожата може да ви спасат и живот,оти доколку се открие навреме, овој вид на рак во поголем процент од случаевите може да се излекува. За самопреглед ви е потребно огледало каде може целосно да се видите, како и мало рачно огледало. Прегледајте го секој сантиметар од кожата, дури и деловите кои не се изложени на сонце, како кожата на главата, рацете, под градите, па дури и кожата на интимните делови и табаните.
ОБЕМ НА ПОЛОВИНАТА – НА ТРИ ДО ЧЕТИРИ МЕСЕЦИ
Обемот на половината може да биде подобар показател на здравјето и на здравствениот ризик, отколку бројката на вагата или индексот на телесната маса. Зошто? Салото на стомакот е поголем ризик фактор кога станува збор за болестите на срцето, инфаркт, дијабетес, отколку салото на другите делови од телото. Генерално, жените се најздрави кога обемот на половината не им преминува 89 сантиметри.
ПУЛС – ЕДНАШ МЕСЕЧНО
Пребрзиот пулс може да биде знак за хипертироидизам, атријална фибрилација (вид на аритмија) и други срцеви проблеми. Едноставно може да го следите, така што со показалецот и средниот прст ќе го напипате пулсот од внатрешната страна на рачниот зголб или на вратот, од страна. Се што треба да направите е да ги броите отчукувањата на половина минута и да ги помножите со два. За нормален пулс, се смета пулсот помеѓу 60 и 100 во состојба на мирување.
ВИСИНА – ЕДНАШ ГОДИШНО
Мерењето на висината еднаш годишно е едноставен начин да следите колку ви се здрави коските. Намалувањето на висината значи дека ги “губите“ коските, а тоа може да биде ран знак за остеопороза, велат лекарите.
КРВЕН ПРИТИСОК – НЕДЕЛНО ИЛИ ДВА ПАТИ ВО НЕДЕЛАТА
Редовните контроли на крвниот притисок може да ви дадат увид во моменталната и идна здравствена состојба. Некој кој е здрав, но повремено има покачување на притисокот – без дијагноза хипертензија, треба да го контролира крвниот притисок на една недела до на два дена, советуваат лекарите.
