КАКВИ СЕ ПРЕПОРАКИТЕ ЗА ВАКЦИНИРАЊЕ СО ВАКЦИНАТА VAXZEVRIA (АСТРАЗЕНЕКА)?
Придобивката од вакцинирањето со вакцината на АстраЗенека (Vaxzevria) во насока на спречување на хоспитализација и потребата за интензивна нега во болница поради КОВИД-19, во ситуација на интензивна епидемија каква што е во моментов во земјава, кај сите возрасни групи е поголема отколку што е ризикот од појава на многу ретки специфични нуспојави карактеризирани со тромбоза (згрутчување на крвта) и тромбоцитопенија (недоволно крвни плочки – тромбоцити што доведува до крварења).
Лицата кои незадолжително и доброволно се вакцинираат против КОВИД-19 мора да бидат информирани дека постои ризик од споменатите многу ретки нуспојави. Европската агенција за лекови (ЕМА) објави минатиот месец дека општиот ризик од појава на несакани ефекти карактеризирани со тромбоза и тромбоцитопенија е многу низок. Истовремено се проценува дека ризикот е двојно поголем кај лица помлади од 50 години, во споредба со повозрасните лица и дека се намалува со возраста на вакцинираното лице.
Освен наведениот ризик кај лицата под 50 години, не се идентификувани други ризик фактори кои би го зголемиле ризикот за развој на тие ретки нуспојави кај вакцинираните лица.
Лицата кои се вакцинираат со вакцината на АстраЗенека треба веднаш да се јават кај лекар ако четири до 21 ден по вакцинирањето ги забележат знаците кои може да упатуваат на тромбоцитопенија или тромбоза:
- Краток здив
- Болка во градите или желудникот
- Оток или чувство на студениило во раката или ногата
- Заматен вид, силна главоболка или главоболка која се влошува по вакцинирањето
- Крварење кое не престанува
- Повеќекратни мали модринки, црвенкасти или виолетови дамки или крвави пликови под кожата
КОЛКУ ДОЗИ ВАКЦИНА КОЈА РУТИНСКИ СЕ ПРИМА ВО ДВЕ ДОЗИ (ФАЈЗЕР, МОДЕРНА, АСТРАЗЕНЕКА), ТРЕБА ДА ПРИМИ ЛИЦЕ КОЕ ПРЕЛЕЖАЛО КОВИД-19?
Податоците за траењето на заштитата по прележувањето и за потребата за вакцинирање потоа, се уште не се достапни. На почетокот се сметаше дека сите кои прележале се вакцинираат на ист начин како и лицата кои не биле инфицирани со коронавирусот. Претходните препораки, препорачуваа вакцинација еден месец по прележување на болеста. Подоцна тие препораки станаа пофлексибилни и во моментив е актуелен ставот дека лице кое прележало КОВИД-19, треба да се вакцинира 3-6 месеци подоцна.
За бројот на дози кои е потребно да се примат по прележувањето, засега има многу малку докази.
Од имунолошки аспект, логична е претпоставката дека една доза вакцина кај лице кое прележало КОВИД-19 поттикнува имуна реакција која е еднакво добра како лице кое не прележало КОВИД-19, а примило две дози вакцина.
На таков заклучок, наведуваат неколку последни научни трудови, кои допрва треба да бидат јавно објавени.
Се смета, велат научниците, дека од имунолошки аспект е оправдано кај лица кои ја прележале болеста КОВИД-19 да се примени една доза од било која вакцина против КОВИД-19, три до шест месеци по прележувањето на болеста.
