Oдлуката да се има или да се нема деца – е личен избор. За некои тоа е обврска, за други – товар, па се посветуваат, на пример, на миленичиња. И сето тоа е во ред, се разбира.
Но ако мислите дека ова е само прашање на вашиот став, се лажете – новото истражување покажува дека возраста на жената кога станала мајка може да влијае врз тоа дали нејзината ќерка ќе има деца.
Имено, колку е мајката постара кога ќе роди ќерка, толку е помала веројатноста дека нејзината ќерка ќе сака да има деца подоцна во животот, велат резултатите од новата студија спроведена од истражувачите од Универзитетот Мекгил, Канада
Истражувачите ги анализирале податоците на повеќе од 43 000 жени. Во овие податоци откриле дека ќерките чии мајки ги родиле во средината на дваесеттите или триесеттите години биле почесто без деца, во споредба со ќерките на мајките кои ги родиле помеѓу 20 и 24 години. Колку постари биле мајките, толку помала била веројатноста дека нивните ќерки ќе имаат свои деца.
Важно е да се напомене дека ова истражување не објаснува зошто постои оваа врска. Д-р Олга Басо, автор на студијата, го дава своето лично мислење: „Може да се каже дека жените кои имаат деца на постара возраст имаат ќерки на кои им пренеле поинакво однесување. Тие може да имаат различни амбиции и различни планови. Бев загрижена кога ги видов овие резултати затоа што навистина мислам дека жените треба да имаат деца кога ќе се чувствуваат подготвени и дека тоа е навистина прашање на избор. Не сакам луѓето да веруваат, како резултат на оваа студија, дека мора да имаат деца пред 25 години.“
Не постои совршена возраст за бременост и раѓање по прв пат. Идејата дека жените кои раѓаат во своите дваесетти години се поздрави или дека жените кои раѓаат во нивните четириесетти години се помудри – не е научен факт. Дете би требало да имате кога и ако сте подготвени.
