Резултатите од новата американска студија која ја спровеле научниците од Универзитетот во Мериленд, укажуваат на тоа дека луѓето кои се помлади од 50 години, а се пушачи, се изложени на поголем ризик од мозочен удар. Па така, колку повеќе пуши некоја личност, толку е поголем нејзиниот ризик од удар.
Мажите кои пушат, во просек имаат 88 отсто поголем ризик од мозочен удар, отколку мажите кои никогаш не пушеле.
Мажите кои пушат помалку од 11 цигари дневно, се изложени на 46 проценти поголем ризик од мозочен удар. Додека мажите кои пушат две или повеќе кутии цигари дневно се изложени на речиси пет пати поголем ризик од мозочен удар, отколку мажите кои никогаш не пушеле.
Овие резултати се особено важни, бидејќи зачестеноста на исхемични мозочни удари кај младите возрасни лица е во пораст. Подеднакво, во пораст е и употребата на тутун кај младите луѓе.
Само целосното прекинување на пушењето може драстично да го намали ризикот од удар.
Поврзаноста на пушењето и кардиоваскуларните заболувања е одамна позната. Пушењето може да ја забрза атеросклерозата и да ги зголеми шансите за создавање на крвни згрутчувања, пишува „Stroke“.
