Со престојот во колективи како градинка, училиште, значително се зголемува можноста за разболување од настинка, вироза, но и многу заразни болести. Ваквите болести се претежно респираторни, најчесто вирусни инфекции.
„Почнуваат со карактеристични симптоми на течење на носот и кашлање, а можна е и температура. За вирусна болест, детето се третира исклучиво со симптоматска терапија, сирупи за симнување на температурата, капки за нос и сирупи против кашлање, како и добра хидратација (течности, чаеви, вода), сето она што секој родител би требало да го има дома… Обично поминува за 3-5 дена“, објаснуваат педијатрите.
Иако педијатарот на преглед не гледа ништо особено во клиничката слика на детето и не препишува антибиотик, би било добро детето неколку дена да не оди во градинка, да мирува и да се третира дома. Полесно болно дете додека чека на преглед во педијатриска ординација, може да добие многу потешка и посериозна болест! Во случај на компликации, односно влошување на општата состојба на детето веднаш се оди на педијатар.
Најчестите симптоми на настинка се замор, затнат нос, блага температура или пецкање во грлото. Ако се работи за симптоми на настинка, не треба да одите кај педијатар. Дури и неколку дена со температура која родителите можат да ја намалат со сируп нема потреба да се јавуваат на педијатар. Ако симптомите се изразени, а температура трае и не се симнува, односно трае неколку денови, не реагира на сирупи, има појава на осип, треска и општа лоша состојба, секако, е аларм за задолжителна посета на педијатар.
