Консумирањето ореви неколку пати неделно може да помогне во намалување на ризикот од атријална фибрилација и евентуално затајување на срцето, покажала новата студија. Имено, луѓето кои консумирале ореви три или повеќе пати неделно имале 18 отсто помал ризик од атријална фибрилација.
Оревите се богат извор на незаситени масни киселини, протеини, влакна, минерали, витамин Е, фолна киселина и други биоактивни соединенија, како што се феноли и фитостероли.
Претходните студии покажале дека јадењето ореви има антиоксидантски и антивоспалителен ефект и дека може да го подобри нивото на липиди во крвта и ендотелна функција, и да го спречи дебелеењето.
Генерално, се покажало дека консумацијата на ореви е поврзана со намалување на ризик од срцев удар (миокарден инфаркт), затајување на срцето, атријална фибрилација и аневризма на абдоминалната аорта, пишува „Heart“.
