Истражувачи од Универзитетот во Единбург во лабораториски услови ги довеле човечките јајце-клетки до зрелост следејќи ги од најрана фаза. Студијата е направена за да се добие нов увид во тоа како се развиваат човечките јајце-клетки и како потенцијално би можеле да понудат нов избор за лицата кај кои постои ризик од губење на плодноста.
За таа цел, научниците земале ткиво од јајчниците од 10 жени кои биле на возраст во доцните 20-ти и 30-ти години. Користејќи разни нутриенти, тие ги поттикнале јајце- клетките да се развијат до степен на зрелост при која би можеле да бидат оплодени. Вкупно 48 јајца достигнале завршна фаза од процесот, а десет од нив, достигнале целосна зрелост.
Ваквото истражување, според професорите е многу значајно за девојчињата кои се изложени на ризик од неплодност поради радиотерапија или хемотерапија, а на кои може да се извадат клетки од оваријално ткиво пред да започне со третманот и повторно да се реимплантираат подоцна.
„За младите девојчиња кои се уште не поминале низ пубертет и се уште не произведуваат јајце-клетки ова е единствената опција за зачувување на плодноста“, вели Евелин Телфер, коавтор на истражувањето.
Истражувачите се уште имаат многу работа пред да оваа постапка може да се користи во пракса. Во најмала рака, ќе бидат потребни неколку години за да научниците се сигурни дека зрелите јајце-клетки се здрави.
Целта на тимот е да се обиде да ги оплоди јајце-клетките, така што ќе може да изврши тестирање на ембрионите. Тие изјавиле дека треба да го подобрат процесот за да се осигураат дека овие лабораториски јајца се исто толку здрави како оние во телото на жената.
