Зголемен артериски притисок или артериска хипертензија е хронична незаразна болест која зафаќа голем процент на возрасната популација, па како и сите популациски болести е нешто со што треба да се научи да се живее и да се спроведува самоконтрола на болеста.
Самоконтролата е особено важна во летните месеци кога, поради жештините, промените во кардиоваскуларниот систем резултираат со пониски вредности на притисок отколку во зимските месеци. Затоа е важно пациентот, во договор со надлежниот лекар, да знае при кои вредности на притисокот евентуално треба да ја намали дозата или да го пие лекот, но никогаш не на своја рака.
Секако, дека треба да се внимава при непосредно изложување на високи температури и да не се престојува на сонце во средина на денот, кога е најтопло и соодветно да се хидрира телото консумирајќи доволна количина на вода.
Што кога притисокот расте, иако пиете од препишаната терапија?
Ненадејно зголемување на крвниот притисок често е проблем со кој се соочуваат пациентите и најчесто е предизвикан од надворешни причини кои немаат директна врска со самата болест – хипертензија, туку е последица на рефлекси кои се јавуваат во автономниот нервен систем, а се стимулирани од психичка напнатост или стрес, ненадеен физички напор, вазомоторни промени. Ако притисокот се зголеми од 20-30 mmHg во однос на постоечкиот, потребно е да се опуштите колку што е можно повеќе, па дури и да се напиете лек за тоа опуштање. За половина до еден час мерењето на притисокот се повторува и најчесто се враќа во нормала. Ако, пак, притисокот е во пораст над 200 mmHg во мирување и нема тенденција да се намали, тогаш можна е употреба на лекови од групата на брзоделувачки нитрати кои ќе го намалат притисокот, но веднаш треба да се направи консултација со лекар, кој ќе провери дали е потребна корекција на терапијата.
Прескокнување на срцето – смее ли и во која мера треба да се толерира?
Прескокнувањето на срцето или екстрасистоли се најчеста форма на аритмија и во повеќето случаи се јавува кај целосно здраво срце и е последица на надворешни причини и тоа најчесто стрес. Но, доколку се јавува често и предизвикува симптоми, тогаш треба да се лекува, пред се, да се направи ултразвукот на срцето за да се потврди дали срцето со изгледот и функцијата е здраво, како и да се направи Холтер ЕКГ за да се утврди бројот и потеклото на екстрасистолите, па според тие насоки да се одреди дали состојбата треба или не треба да се лекува.
